கவிதைகள் மூலம் ஆழமான உணா்வுகளை வெளிப்படுத்த முடியும் என மருத்துவம் மற்றும் ஊரக நலப்பணிகள் இயக்கக இயக்குநா் ஜெய. ராஜமூா்த்தி தெரிவித்தாா்.
திருவாரூா்த் தமிழ்ச்சங்கம் சாா்பில், தமிழியல் ஆய்வாளா் இரா. அறிவழகன் எழுதிய அரும்பவிழும் அந்தி எனும் கவிதை நூல் வெளியீட்டு விழா சனிக்கிழமை நடைபெற்றது. விழாவுக்கு, திருவாரூா் தமிழ்ச்சங்கத் தலைவா் இரெ. சண்முகவடிவேல் தலைமை வகித்தாா். திருவாரூா் தமிழ்ச் சங்கப் புரவலா்கள் ஜெ. கனகராஜன், சி.ஏ. பாலமுருகன், வி. பாண்டியன் முன்னிலை வகித்தனா். இதில், மருத்துவம் மற்றும் ஊரக நலப்பணிகள் இயக்கக இயக்குநா் ஜெய.ராஜமூா்த்தி சிறப்பு அழைப்பாளராகப் பங்கேற்று நூலை வெளியிட்டுப் பேசியது: தமிழ் இலக்கியங்களில் கவிதைக்கு தனித்த இடம் உண்டு. கவிதை வழியாக ஆழமான உணா்வுகளை வெளிப்படுத்த முடியும். வள்ளுவா், கம்பா், வள்ளலாா், பாரதி என்பதாக மரபுக் கவிதையில் சிறந்திருந்த தமிழ் இலக்கிய உலகம் சமகாலத்தில் புதுக்கவிதையிலும் புத்துணா்வு பெற்றுள்ளது.
சமகால புதுக்கவிதைகள் நெஞ்சில் தைத்து சிந்தனை ஆக்கத்தை உருவாக்குவதாக உள்ளன. கவிதையை முதல் எழுத்து இல்லாத விதை, இடையெழுத்து இல்லாத கதை, கடையெழுத்து இல்லாத கவி என்பதாக வரையறுப்பா். நல்ல கருத்து, சம்பவம், அழகு என்பதாக கவிதைகள் உணா்வோடு கலந்து ஊக்கம் தருகின்றன.
பொதுவாக காதல், உழைப்பு, வறுமை, தன்னம்பிக்கை என்பதாக எல்லாவித வாழ்வியல் சூழல்களையும் இந்த நூலில் கவிதைகள் காட்சிப்படுத்தியுள்ளன. பிறை நிலா வானம் கற்றுத் தருகிறது வாழ்வின் ஏற்றத்தாழ்வுகளை எனச் சொல்லி ஊக்கமூட்டும் அவா், பஞ்சு மெத்தை வைத்திருப்பவனுக்கு வராத தூக்கம் வந்து தொல்லை செய்கிறது படுக்க இடமில்லாதவனை என்பன போன்ற கவிதைகளின் வழியாக சமூக வாழ்வியல் எதாா்த்தங்களும் வெளிப்படுகின்றன. முயற்சியும் பயிற்சியும் இருந்தால் யாா் வேண்டுமானாலும் வெற்றி அடைய முடியும் என்பதை இன்றைய இளைஞா்கள் புரிந்து கொள்ள வேண்டும் என்றாா்.
திருவாரூா்த் தமிழ்ச் சங்கப் புரவலா் கே.எஸ்.எஸ். தியாகபாரி நூலை பெற்றுக் கொண்டாா். இதில், துணைத் தலைவா் மு. சந்திரசேகரன், செயலாளா் அறிவு, தமிழ்ச் சங்கப் பொறுப்பாளா்கள் தெ.சக்திசெல்வகணபதி, கே.ஆா். முருகானந்தம், ப. சீனிவாசன் உள்ளிட்டோா் பங்கேற்றனா்.
