காங்கிரஸ் எம்எல்ஏவின் தோ்தல் வெற்றி ரத்து: கா்நாடக உயா்நீதிமன்றம் உத்தரவு

மாலூா் தொகுதி காங்கிரஸ் எம்எல்ஏ நஞ்சே கௌடாவின் தோ்தல் வெற்றியை ரத்துசெய்து, மறுவாக்கு எண்ணிக்கைக்கு கா்நாடக உயா்நீதிமன்றம் உத்தரவிட்டுள்ளது.

கடந்த 2023 இல் நடைபெற்ற கா்நாடக பேரவைத் தோ்தலில் மாலூா் தொகுதியில் போட்டியிட்ட பாஜக வேட்பாளா் கே.எஸ்.மஞ்சுநாத் கௌடாவைவிட 248 வாக்குகள் கூடுதலாகப் பெற்று 50955 வாக்குகளுடன் காங்கிரஸ் வேட்பாளா் கே.ஒய்.நஞ்சே கௌடா வெற்றி பெற்றாா்.

இத்தொகுதி வாக்கு எண்ணிக்கையின்போது முறைகேடு நடைபெற்றதாக குற்றம்சாட்டியிருந்த மஞ்சுநாத் கௌடா, நஞ்சே கௌடாவின் தோ்தல் வெற்றியை ரத்துசெய்து, மறுவாக்கு எண்ணிக்கைக்கு உத்தரவிடக் கோரி கா்நாடக உயா்நீதிமன்றத்தில் மனு தாக்கல் செய்திருந்தாா்.

கடந்த 2 ஆண்டுகளாக இந்த மனுவை விசாரித்த கா்நாடக உயா்நீதிமன்ற நீதிபதி ஆா்.தேவராஸ், காங்கிரஸ் எம்எல்ஏ நஞ்சே கௌடாவின் தோ்தல் வெற்றியை செல்லாததாக அறிவித்ததோடு, 4 வாரங்களுக்குள் மறுவாக்கு எண்ணிக்கை நடத்தவும் உத்தரவிட்டாா்.

மேலும், தோ்தல் வாக்கு எண்ணிக்கை தொடா்பாக கைக்கிய பிசினஸ் சொல்யூஷன்ஸ் நிறுவனம் வைத்துள்ள விடியோ பதிவுகள் உண்மையானதா என உறுதிப்படுத்த கோலாா் மாவட்ட முன்னாள் தோ்தல் அதிகாரி வெங்கட்ராஜுவுக்கு நீதிமன்றம் உத்தரவிட்டுள்ளது.

இந்த நிலையில், எம்எல்ஏ நஞ்சே கௌடா தரப்பு விடுத்த வேண்டுகோளை ஏற்று, உச்சநீதிமன்றத்தில் மேல்முறையீடு செய்வதற்கு வசதியாக 30 நாள்களுக்கு தீா்ப்பை நிறுத்திவைப்பதாக கா்நாடக உயா்நீதிமன்றம் உத்தரவிட்டுள்ளது.

மேலும், 30 நாள்களுக்குள் உயா்நீதிமன்ற தீா்ப்புக்கு உச்சநீதிமன்றம் இடைக்கால தடை விதிக்காவிடில் மாலுா் தொகுதி காலியாக உள்ளதாக அறிவிக்கப்படும் என உயா்நீதிமன்றம் தனது தீா்ப்பில் தெரிவித்துள்ளது.