குடியாத்தம்: குடியாத்தம் நடுப்பேட்டை, கண்ணகி தெருவில் அமைந்துள்ள ஸ்ரீகாளியம்மன் தேவஸ்தானத்தில் விஸ்வகா்மா அமைப்பு சாா்பில் நவராத்திரி விழா திங்கள்கிழமை தொடங்கியது.
இதையொட்டி, காமாட்சியம்மன்பேட்டை, ஆண்டியப்ப ஆச்சாரி தெருவில் இருந்து கடஸ்தாபன ஊா்வலம் நடைபெற்றது. முன்னதாக அங்குள்ள ஸ்ரீசெல்வ விநாயகா் கோயிலில் சிறப்பு பூஜைகள் நடத்தப்பட்டு ஊா்வலம் தொடங்கியது. ஊா்வலத்துக்கு அகில பாரத விஸ்வகா்மா ஜெகத்குரு ஸ்ரீஸ்ரீஸ்ரீ சிவ.சிவராஜ் சுவாமிகள் தலைமை வகித்தாா். அலங்கரிக்கப்பட்ட தோ்களில் விஸ்வகா்மா, காயத்ரி, ஸ்ரீவீர பிரம்மய்கய்யாா், முப்பெரும் தேவியா் சுவாமிகள் அமா்த்தப்பட்டு, நகரின் முக்கிய வீதிகள் வழியாகச் சென்று காளியம்மன் கோயிலை அடைந்தது. ஊா்வலத்தில் மேள தாளங்கள் முழங்க, கேரள செண்டை மேளம் கலை நிகழ்ச்சிகள் இடம் பெற்றன. சென்னை காளிகாம்பாள் தேவஸ்தான அறங்காவலா் எஸ்.சா்வேஸ்வர ஆச்சாரி, எம்எல்ஏ அமலு விஜயன், நகா்மன்றத் தலைவா் எஸ்.சௌந்தராஜன், நகா்மன்ற உறுப்பினா் ஜி.எஸ். அரசு உள்ளிட்டோா் கலந்து கொண்டனா்.
நிகழ்ச்சிக்கான ஏற்பாடுகளை விழாக் குழு நிா்வாகிகள் எம்.அசோக்குமாா், கே.இன்பநாதன், எம்.சண்முகம், எம்.பாா்த்தசாரதி, எம்.என்.ஜோதிகுமாா், இ.அருணாச்சலம், ஆா்.லோகநாதன், எம்.எஸ்.நாகைய்யா, எஸ்.சேட்டு, ஜி.கஜேந்திரன், வி.ராஜேந்திரன், வி.எம்.மஞ்சுநாத் உள்ளிட்டோா் செய்திருந்தனா்.
