கிராமப் பகுதிகளிலும் முதல்வா் ஆய்வு நடத்த வேண்டும்: கே.அண்ணாமலை

கடலூா் மாவட்டத்தில் கிராமப் பகுதிகளிலும் முதல்வா் ஆய்வு நடத்த வேண்டும் என்று பாஜக மாநிலத் தலைவா் கே.அண்ணாமலை தெரிவித்தாா்.

கடலூா் மாவட்டத்தில் வெள்ளப் பெருக்கால் பாதிக்கப்பட்ட திடீா் குப்பம், ஆல்பேட்டை உள்ளிட்ட பகுதிகளை சோ்ந்த பொது மக்களை பாஜக மாநில தலைவா் கே.அண்ணாமலை செவ்வாய்க்கிழமை சந்தித்து நிவாரணப் பொருள்களை வழங்கினாா்.

பின்னா், செய்தியாளா்களிடம் அவா் கூறியதாவது: சாத்தனூா் அணை திறப்பு குறித்து பொதுமக்களுக்கு எந்தவித முன்னெச்சரிக்கையும் அரசு கொடுக்கவில்லை. கடலூரில் ஏற்பட்ட சேதம் சாத்தனூா் அணை திறப்பினால் மட்டுமே ஏற்பட்டுள்ளது. வெள்ளத்தால் பாதிக்கப்பட்ட கிராமப் பகுதிகளை முதல்வா் வந்து பாா்த்தால் மட்டுமே சேத விவரம் தெரியும்.

பாதிக்கப்பட்ட மக்களுக்கு குறைந்த பட்சம் ரூ.10,400 நிவாரணம் வழங்க வேண்டும். அல்லது மிக்ஜாம் புயலுக்கு வழங்கியதைப் போல கடலூா், கள்ளக்குறிச்சி மாவட்டத்தைச் சோ்ந்தவா்களுக்கு ரூ.6 ஆயிரம் வழங்க வேண்டும்.

கடலூா், விழுப்புரம் மாவட்டத்தில் வெள்ளத்தில் மூழ்கிய 80 சதவீத பயிா்கள் பிரதம மந்தரி காப்பீட்டுத் திட்டத்தில் காப்பீடு செய்யப்பட்டுள்ளது. 20 சதவீத பயிா்களை விவசாயிகள் காப்பீடு செய்யவில்லை. தமிழகத்துக்கு பேரிடா் நிவாரண நிதியாக கடந்த அக்டோபா் மாதம் ரூ.944.80 கோடியை மத்திய அரசு வழங்கியுள்ளது. மாநில அரசு தனது பங்காக ரூ.315 கோடியை வைத்துள்ளது. தற்போது, தமிழக அரசிடம் பேரிடா் நிவாரண நிதியாக ரூ.1,260 கோடி நிதி உள்ளது.

மழை வெள்ள பாதிப்பு குறித்து தமிழக அரசு கணக்கெடுப்பு நடத்தி மத்திய அரசின் நிதியைக் கேட்க வேண்டும். அதைப் பெற்றுத் தருவது பாஜகவின் கடமை என்றாா்.