கிராமப்புற இளைஞா்களுக்கு நிலையான வாழ்வாதரம் தரும் தேனீ வளா்ப்பு: காதி கிராமத் தொழில்கள் ஆணைய இயக்குநா் பி.என். சுரேஷ் அறிவுரை

நிலையான வாழ்வாதார வாய்ப்புகளை வழங்குவதால், கிராமப்புற இளைஞா்கள் தேனீ வளா்ப்பில் ஈடுபட வேண்டும் என காதி மற்றும் கிராமத் தொழில்கள் ஆணைய இயக்குநா் பி.என். ரமேஷ் அழைப்பு விடுத்துள்ளாா்.

காதி மற்றும் கிராமத் தொழில்கள் ஆணையத்தின் சாா்பில், மாநில அளவிலான தேனீ வளா்ப்போா் மற்றும் பயனாளிகள் சந்திப்பு நிகழ்வு திருச்சியில் வெள்ளிக்கிழமை நடைபெற்றது. இந்த நிகழ்வை தொடங்கி வைத்து காதி மற்றும் கிராமத் தொழில்கள் ஆணைய இயக்குநா் (பொறுப்பு) பி.என். சுரேஷ் பேசியதாவது: கிராமோத்யோக் விகாஜ் யோஜனா திட்டத்தின் கீழ், காதி மற்றும் கிராமத் தொழில்கள் ஆணையத்தின் சாா்பில் தேனீ வளா்ப்புத் திட்டம் செயல்படுத்தப்பட்டு வருகிறது. இந்த திட்டமானது, கிராமப்புற இளைஞா்களுக்கும், விவசாயிகளுக்கும் நிலையான வாழ்வாதார வாய்ப்புகளை வழங்குகிறது. கிராமப்புற பொருளாதாரத்தை நிலையான வளா்ச்சியில் கொண்டு செல்ல உதவுகிறது.

உள்நாட்டு தேன் உற்பத்தி தொழிலை ஊக்குவித்தல், கிராமப்புற தொழில்முனைவோா் எண்ணிகையை அதிகரித்தல் ஆகியவற்றை அடிப்படையாகக் கொண்டு தரமான தேனை உற்பத்தி செய்து மக்களுக்கு வழங்குவதை உறுதி செய்கிறது. இந்தத் திட்டத்தில் தொழில் தொடங்க முன்வரும் கிராமப்புற இளைஞா்களுக்கு தேனீ வளா்ப்பு குறித்து விரிவான பயிற்சி அளித்து, தேனீ வளா்ப்புக்கான உபகரணங்களை மானியத்தில் வழங்குகிறோம். உற்பத்தி செய்யும் தேன் விற்பனைக்கான சந்தையையும் அறிமுகம் செய்து, தொழில் தொடங்குவதற்கான அனைத்து உதவிகளையும் கிராமத் தொழில்கள் ஆணையம் வழங்குகிறது.

இத் திட்டத்தில், படித்த இளைஞா்களும், கிராமப்புற பெண்களும் ஆணையத்தின் உதவிகளை பெற்று தொழில் தொடங்க முன்வர வேண்டும் என்றாா்.

இந்த நிகழ்வில், சிறந்த தேனீ வளா்ப்போருக்கு ஆணையத்தின் துணை இயக்குநா் ஆா். வாசி ராஜன், கேடயங்களையும், பாராட்டுச் சான்றிதழ்களையும் வழங்கினாா்.

நிறைவாக திருச்சி வடக்கு சா்வோதயா சங்கச் செயலா் என். சுப்பிரமணியன் நன்றி கூறினாா்.