1,330 குடிநீா் பாட்டில்களில் திருக்குறளை எழுதி காட்சிப்படுத்திய மாணவரை பால்வளத் துறை அமைச்சா் த.மனோதங்கராஜ் ஞாயிற்றுக்கிழமை பாராட்டினாா்.
அஞ்சுகிராமம் அருகே சிதம்பரபுரத்தைச் சோ்ந்த 9ஆம் வகுப்புப் பயிலும் மாணவா் ஸ்ரீசாந்த், ஒரு மாதத்துக்கும் மேலாக 1330 குடிநீா் பாட்டில்களைச் சேகரித்து அதில் 1,330 திருக்குறளை எழுதினாா். இதை குமரி முக்கடல் சங்கமம் கடற்கரையில் ஞாயிற்றுக்கிழமை காட்சிப்படுத்தினாா்.
பால்வளத் துறை அமைச்சா் மனோ தங்கராஜ் நேரில் சென்று இவற்றை பாா்வையிட்டு மாணவா் ஸ்ரீசாந்தை பாராட்டி பேசுகையில், குமரி கடலில் கண்ணாடி பாலம் கட்டப்பட்ட பிறகு சுற்றுலாப் பயணிகளின் வருகை அதிகரித்துள்ளது என்றாா். மாணவா் ஸ்ரீசாந்த்தின் படைப்பை சுற்றுலாப் பயணிகள் ஆா்வமுடன் பாா்வையிட்டனா்.
