குடியரசுத் தலைவா் வருகை: பாதுகாப்பு ஏற்பாடுகள் தீவிரம்

ஸ்ரீரங்கம் அரங்கநாதசுவாமி திருக்கோயிலில் குடியரசுத் தலைவா் திரெளபதி முா்மு புதன்கிழமை சுவாமி தரிசனம் செய்யவுள்ளதால், திருச்சி மாநகரம் முழுவதும் தீவிர பாதுகாப்பு வளையத்தின் கீழ் கொண்டுவரப்பட்டுள்ளது.

குடியரசுத் தலைவா் வருகையை முன்னிட்டு ஸ்ரீரங்கம் யாத்ரி நிவாஸ் எதிரே உள்ள கொள்ளிடக்கரை பஞ்சக்கரை ஹெலிபேடு தளத்தை தில்லியிலிருந்து வந்திருந்த சிறப்பு பாதுகாப்புப் பிரிவு அதிகாரிகள் திங்கள்கிழமை ஆய்வு செய்தனா். மேலும், 2 ஹெலிகாப்டா்கள் மூலமாக ஹெலிபேடு இறங்குதளத்தில், ஹெலிகாப்டரை ஏற்றி, இறக்கி ஒத்திகை பாா்த்தனா்.

இதேபோல, சாலை மாா்க்கமாக கோயிலுக்குச் செல்லும் வழியிலும் ஒத்திகை நடைபெற்றது. மேலும், கோயிலில் குடியரசுத் தலைவா் நடந்து செல்லும் வழி, பேட்டரி காரில் செல்லும் வழி, சுவாமி தரிசனம் செய்யவுள்ள சந்நிதிகள் என ஒவ்வொன்றாக திட்டமிட்ட வரிசைப்படி சென்று வெளியேறும் வரையில் ஒத்திகை பாா்க்கப்பட்டது.

திருச்சி விமான நிலையம், ஸ்ரீரங்கம் பஞ்சக்கரை, அரங்கநாதசுவாமி திருக்கோயில் மற்றும் அவா் காரில் செல்லும் சாலை வழித்தடங்களில் 5 அடுக்கு பாதுகாப்பு ஏற்பாடுகள் செய்யப்பட்டுள்ளன. திருச்சி மாநகரம் முழுவதும் தீவிர பாதுகாப்பு வளையத்தின் கீழ் கொண்டு வரப்பட்டுள்ளன.

குடியரசுத் தலைவா் வருகை தொடா்பான ஆலோசனைக் கூட்டம் திருச்சி விமான நிலையத்திலும், ஸ்ரீரங்கம் கோயிலிலும் திங்கள்கிழமை நடைபெற்றது.

இந்தக் கூட்டங்களில் ஆட்சியா் வே.சரவணன், காவல் ஆணையா் என்.காமினி, மாநகராட்சி ஆணையா் லி.மதுபாலன் மற்றும் விமான நிலைய அதிகாரிகள், அறநிலையத்துறை அதிகாரிகள் உள்ளிட்டோா் கலந்துகொண்டனா்.

பாதுகாப்பு காரணம் கருதி செப்.2 முதல் 3-ஆம் தேதி நள்ளிரவு 12 மணிவரை திருச்சி மாவட்டத்தில் ட்ரோன்கள் பறக்க தடை விதிக்கப்பட்டுள்ளது என மாவட்ட ஆட்சியா் வே. சரவணன் தெரிவித்துள்ளாா்.

இதற்கிடையில், ஸ்ரீரங்கம் ஹெலிபேடு தளம் அருகே தீயணைப்புத் துறை வாகனங்கள், ஆம்புலன்ஸ், போலீஸ் பாதுகாப்பு வாகனங்கள் முகாமிட்டுள்ளன. ஸ்ரீரங்கம் முழுவதும் திங்கள்கிழமையே பரபரப்பாக காணப்பட்டது.

குடியரசுத் தலைவா் வருகையும், புறப்பாடும்

குடியரசுத் தலைவா் திரெளபதி முா்மு இரண்டு நாள் பயணமாக தமிழகத்துக்கு செவ்வாய்க்கிழமை வருகை தருகிறாா். சென்னையில் பல்வேறு நிகழ்ச்சிகளில் பங்கேற்கும் குடியரசுத் தலைவா், நாளை மறுநாள் (செப். 3) சென்னையில் இருந்து தனி விமானத்தில் திருச்சி விமான நிலையத்துக்கு காலை 11 மணிக்கு வருகிறாா்.

இதனைத் தொடா்ந்து, ஹெலிகாப்டரில் திருவாரூா் சென்று, தமிழ்நாடு மத்திய பல்கலை.யில் நடைபெறும் 10-ஆவது பட்டமளிப்பு விழாவில் பங்கேற்கிறாா். பின்னா், திருவாரூரில் இருந்து மாலை 3.30 மணிக்கு ஹெலிகாப்டரில் புறப்பட்டு, ஸ்ரீரங்கம் பஞ்சக்கரை ஹெலிபேடு தளத்துக்கு வருகிறாா்.

அங்கிருந்து காரில் புறப்பட்டு மாலை ஸ்ரீரங்கம் அரங்ககநாதசுவாமி கோயிலுக்குச் செல்கிறாா். மாலை 6 மணிக்கு முன்னதாக தரிசனம் முடிந்தால், ஹெலிகாப்டா் மூலமே அவா் திருச்சி விமான நிலையம் செல்லவும் திட்டமிடப்பட்டுள்ளது. திருச்சி விமான நிலையத்தில் இரவு உணவை முடித்துக்கொண்டு, இரவு 7 மணியளவில் தனி விமானம் மூலம் தில்லிக்குப் புறப்பட்டுச் செல்லும் வகையில் ஏற்பாடுகள் செய்யப்பட்டுள்ளன.