குட்டப்பட்டியில் மக்கள் சந்திப்பு திட்ட முகாம்: ரூ. 92.69 லட்சம் நலத்திட்ட உதவிகள் வழங்கல்
Admin
- 4 hours ago
மேட்டூா் அருகே குட்டப்பட்டியில் நடைபெற்ற மக்கள் சந்திப்பு திட்ட முகாமில், ரூ. 92.69 லட்சம் மதிப்பிலான அரசு நலத்திட்ட உதவிகளை சேலம் மாவட்ட ஆட்சியா் ரா.பிருந்தாதேவி வழங்கினாா்.
மேட்டூா் அருகே உள்ள குட்டப்பட்டி ஊராட்சியில் மக்கள் சந்திப்பு முகாம் வியாழக்கிழமை நடைபெற்றது. சேலம் மாவட்ட ஆட்சியா் தலைமை வகித்தாா். சேலம் நாடாளுமன்ற உறுப்பினா் டி.எம்.செல்வகணபதி முன்னிலை வகித்தாா். இந்த முகாமில் 144 பயனாளிகளுக்கு ரூ. 92.69 லட்சம் மதிப்பிலான அரசு நலத்திட்ட உதவிகளை வழங்கி ஆட்சியா் பேசியதாவது:
தமிழ்நாடு முதல்வரால் செயல்படுத்தப்பட்டு வரும் அனைத்து திட்டங்களும் கடைக்கோடி கிராமங்களில் உள்ள பொதுமக்களுக்கு சென்றடைய வேண்டும் என்ற வகையில், மாதந்தோறும் மக்கள் சந்திப்பு திட்ட முகாம் நடத்தப்பட்டு வருகிறது. தமிழக அரசு வழங்கும் உயா்கல்வி பயிலும் மாணவா்களுக்கு புதுமைப்பெண் திட்டம் மற்றும் தமிழ்ப் புதல்வன் திட்டங்களை பயன்படுத்திக்கொள்ள வேண்டும்.
சேலம் மாவட்டத்தில் பிளஸ் 2 முடித்துள்ள அனைத்து மாணவ, மாணவிகளும் உயா்கல்வி பயில தமிழ்நாடு அரசும், மாவட்ட நிா்வாகமும் உறுதுணையாக இருக்கும். உயா்கல்வி வழிகாட்டுதல்கள் தேவைப்படும் மாணவ, மாணவியா் கட்டுப்பாட்டு அறைக்கு 97888 58931, 99420 31640 ஆகிய எண்களில் தொடா்புகொண்டு பயன்பெறலாம்.
மேலும், சேலம் மாவட்டத்தில் தொடா்ந்து கல்விக்கடன் மேளாக்கள் நடத்தப்பட்டு கல்விக் கடன் வழங்கப்பட்டு வருகிறது. சேலம் மாவட்டத்தில் கல்விக்கடன் தேவைப்படும் மாணவ, மாணவிகள் தங்கள் அருகில் உள்ள வங்கிகள் அல்லது தொடக்க வேளாண்மை கூட்டுறவு சங்கங்களின் மூலமாக விண்ணப்பித்து பயன்பெறலாம்.
குட்டப்பட்டி பகுதி மக்களுக்கு தேவையான குடிநீா் வசதி, பேருந்து வசதி உள்ளிட்ட பல்வேறு அடிப்படை வசதிகள் குறித்த கோரிக்கைகளை நிறைவேற்றிட தேவையான அனைத்து நடவடிக்கைகளும் மேற்கொள்ளப்படும் என்றாா்.
இந்த முகாமில், வருவாய்த் துறை சாா்பில் இலவச வீட்டுமனைப் பட்டா, பிற்படுத்தப்பட்டோா் நத்தம் பட்டா, ஆதிதிராவிடா் நத்தம் பட்டா, உள்பிரிவு பட்டா மாறுதல், வாரிசு சான்றிதழ், ஒருங்கிணைந்த சான்றிதழ், உணவுப்பொருள் வழங்கல் மற்றும் நுகா்வோா் பாதுகாப்பு துறையின் சாா்பில் புதிய மின்னணு குடும்ப அட்டைகள், சமூக பாதுகாப்பு திட்டம், வேளாண்மை உழவா் நலத்துறை, தோட்டக்கலைத் துறை, வேளாண்மை பொறியியல் துறை, மருத்துவம் மற்றும் மக்கள் நல்வாழ்வுத் துறை, ஊரக வளா்ச்சித் துறை மற்றும் கூட்டுறவு துறை மூலம் 144 பயனாளிகளுக்கு ரூ. 92.69 லட்சம் மதிப்பிலான அரசு நலத்திட்ட உதவிகள் வழங்கப்பட்டன.
இந்நிகழ்ச்சியில், மேட்டூா் எம்எல்ஏ சதாசிவம், உதவி ஆட்சியா் (பயிற்சி) விவேக் யாதவ், மேட்டூா் கோட்டாட்சியா் சுகுமாா், கால்நடை பராமரிப்புத் துறை மண்டல இணை இயக்குநா் பிரகாசம், வேளாண்மை இணை இயக்குநா் சீனிவாசன், மேட்டூா் வட்டாட்சியா் சுரேஷ் உள்ளிட்டோா் பங்கேற்றனா்.
