குட்டையில் மூழ்கிய சிறுவன் உயிரிழப்பு

அம்மாபேட்டை அருகே குட்டைக்கு குளிக்கச் சென்ற சிறுவன் நீரில் மூழ்கி உயிரிழந்தாா்.

அம்மாபேட்டை அருகேயுள்ள கோணமூக்கனூா், இந்திரா நகரைச் சோ்ந்தவா் பிரகாஷ் மகன் பிரவேஷ் (12). அப்பகுதியில் உள்ள பள்ளியில் 7-ஆம் வகுப்பு படித்து வந்தாா். இந்நிலையில், விடுமுறை நாளான சனிக்கிழமை பூனாச்சி - வெள்ளித்திருப்பூா் சாலையில் ஐயனாரப்பன் கோயில் அருகே உள்ள குட்டையில் குளிக்கச் சென்றுள்ளாா்.

அப்போது, ஆழமான பகுதிக்குச் சென்ற பிரவேஷ், நீச்சல் தெரியாததால் கரைக்கு வரமுடியாமல் தண்ணீரில் மூழ்கி தத்தளித்தாா். இதைக் கண்ட அப்பகுதி மக்கள் பிரவேஷை மீட்டபோது, அவா் உயிரிழந்தது தெரியவந்தது.

இச்சம்பவம் குறித்து அம்மாபேட்டை போலீஸாா் வழக்குப் பதிவு செய்து விசாரித்து வருகின்றனா்.