கூட்டுறவு சங்கங்களில் வசூல் ஆகாமல் உள்ள கடன்களுக்கான சிறப்பு கடன் தீா்வுத் திட்டம்

கூட்டுறவு சங்கங்களில் வசூல் ஆகாமல் நிலுவையில் உள்ள தவணை தவறிய பண்ணை சாராக் கடன்கள், இதர நீண்டகால நிலுவை இனங்களுக்கான சிறப்பு கடன் தீா்வுத் திட்டம் அறிவிக்கப்பட்டுள்ளது.

இது தொடா்பாக கூட்டுறவு சங்கங்களின் மண்டல இணைப் பதிவாளா் கூறியிருப்பதாவது: கோவை மாவட்ட மத்தியக் கூட்டுறவு வங்கி, மண்டலத்தில் உள்ள தொடக்க வேளாண்மைக் கூட்டுறவு கடன் சங்கங்கள், நகர கூட்டுறவுக் கடன் சங்கங்கள், நகர கூட்டுறவு வங்கிகள், தொடக்கக் கூட்டுறவு வேளாண்மை, ஊரக வளா்ச்சி வங்கிகள், பெரும்பல நோக்கு கூட்டுறவு சங்கங்கள், வேளாண் உற்பத்தியாளா்கள் கூட்டுறவு விற்பனைச் சங்கங்கள் ஆகியவற்றின் மூலம் வழங்கப்பட்ட சிறுவணிகக் கடன், தொழிற்கடன், வீட்டு வசதிக் கடன் உள்ளிட்ட பல்வேறு வகையான பண்ணைசாராக் கடன்கள், வேளாண் உற்பத்தியாளா்கள் கூட்டுறவு விற்பனைச் சங்கங்கள் மூலம் வேளாண் விளைபொருள்களைக் கொள்முதல் விற்பனை செய்த வகையில், உறுப்பினா்களிடமிருந்து வரவேண்டிய இனங்கள் ஆகியவற்றில் 31.12.2022-இல் முழுமையாக தவணை தவறி நிலுவையில் உள்ள கடன்களுக்கு சிறப்புக் கடன் தீா்வுத் திட்டம் - 2023 செயல்படுத்தப்பட்டு வருகிறது.

இத்திட்டத்தின்கீழ் கடனைத் தீா்வு செய்வதற்காக 12.09.2024-க்கு முன்பு 25 சதவீத தொகை செலுத்தி ஒப்பந்தம் மேற்கொள்ளாதவா்களும் ஒப்பந்தம் மேற்கொண்டும், எஞ்சிய 75 சதவீத தொகையை செலுத்தாதவா்களும் தற்போது மொத்த கடன் தொகையையும் (நிலுவை - தீா்வு செய்யும் நாள் வரை 9 சதவீத சாதாரண வட்டி) ஒரே தவணையில் செலுத்தி தங்கள் கடன்களைத் தீா்வு செய்து கொள்ளலாம்.

மேலும், இந்த சிறப்புத் திட்டத்தின்கீழ் மேற்கூறிய கடன்கள் மட்டுமன்றி 31.12.2022 -இல் முழுமையாக தவணை தவறி மூன்று ஆண்டுகளுக்கு மேலான அதாவது, 31.12.2019-க்கு முன்பு தவணை தவறிய மத்திய கால வேளாண் கடன்கள், பயிா்க் கடனாக வழங்கப்பட்டு, மத்திய கால வேளாண் கடனாக மாற்றம் செய்யப்பட்ட கடன்கள், பண்ணை சாா்ந்த நீண்டகால கடன்கள், சிறுதொழில் கடன்கள், மகளிா் தொழில்முனைவோா் கடன்கள் ஆகிய கடன்களையும் தீா்வு செய்யும் நாள் வரையில் 9 சாதாரண வட்டியுடன் நிலுவைத் தொகையை 23.09.2025-க்குள் ஒரே தவணையில் செலுத்தி தீா்வு செய்து கொள்ளலாம்.

தவணை தவறிய கடன்களுக்கான கூடுதல் வட்டி, அபராத வட்டி, இதர செலவினங்கள் முழுமையாக தள்ளுபடி செய்யப்படும். கடன்தாரா்களில் வட்டிச்சுமையை கணிசமாக குறைக்கும் இந்த வாய்ப்பை பயன்படுத்தி, 9 சதவீத சாதாரண வட்டி விகிதத்தில் நிலுவைத் தொகையை ஒரே தவணையில் செலுத்தி தங்களது கடன்களைத் தீா்வு செய்துகொள்ளலாம் என்று தெரிவிக்கப்பட்டுள்ளது.