``கொடநாட்டில் CCTV-ஐ ஆஃப் செய்ய சொன்ன 'Sir' யார்?" - ஓ.பி.எஸ் ஆதரவாளர் மருது அழகுராஜ் கேள்வி!

அண்ணா பல்கலைக்கழக மாணவி பாலியல் தொந்தரவு சம்பவத்தில் கைதாகி உள்ள ஞானசேகரன் போனில் யாருடனோ 'சார்' என்று பேசினார் என்று பாதிக்கப்பட்ட மாணவி அளித்த புகாரில் குறிப்பிடப்பட்டிருந்தது.

அப்போதிருந்து 'யார் அந்த சார்?' என்ற கேள்வி தமிழ்நாடு முழுவதும் பரபரப்பாக கேட்கப்பட்டது. இந்த நிலையில், கடந்த சனிக்கிழமை, சிறப்பு விசாரணைக் குழுவிலும் மாணவி ஞானசேகரன் சாரிடம் பேசியதாக மீண்டும் உறுதி செய்தார்.

'யார் அந்த சார்? என்பதைக் கண்டுபிடிக்க வேண்டும்' என்று பல்வேறு அரசியல் தலைவர்கள் குரல் கொடுத்தும், போராட்டம் நடத்தியும் வருகின்றனர். இன்று சட்டசபைக்கு வந்த அதிமுக ஒருங்கிணைப்பாளர் மற்றும் எதிர்க்கட்சி தலைவரான எடப்பாடி பழனிசாமி உள்ளிட்ட அதிமுக சட்டசபை உறுப்பினர்கள் அனைவரும் தங்களது சட்டையில் 'யார் அந்த சார்?' என்று ஸ்டிக்கருடன் வந்திருந்தனர். மேலும், சட்டசபை தொடக்கத்திலேயே 'யார் அந்த சார்?' என்று முழுக்கமிட்டதால் வெளியேற்றப்பட்டனர்.

இந்த நிலையில், ஓ.பி.எஸ் ஆதரவாளரான மருது அழகுராஜ் தனது பேஸ்புக் பக்கத்தில், "கொடநாடு CCTV-ஐ ஆஃப் பண்ணச் சொன்ன அந்த sir யாருங்கிறதையும் கேளுங்கப்பா..." என்று பதிவிட்டுள்ளார்.

கொடநாடு வழக்கில் எதிர்க்கட்சி தலைவர் எடப்பாடி பழனிசாமியின் பெயர் அடிப்பட்டு வருவது அனைவரும் தெரிந்த விஷயமே. இன்று, அவர் சட்டசபையில் 'யார் அந்த சார்?' என்ற முழக்கமிட்ட நிலையில், இப்போது மருது அழகுராஜின் பதிவு வைரலாகி வருகிறது.