எலான் மஸ்க் மகனின் செயலால் அமெரிக்க அலுவலகப் பாரம்பரியத்தில் மாற்றம்?
கொள்முதல் நிலையங்களில் நடக்கும் ஊழல்களைத் தடுக்க உயா் மட்டத்திலிருந்து நடவடிக்கையைத் தொடங்க வேண்டும் என தமிழ்நாடு அரசுக்கு ஏஐடியுசி வேண்டுகோள் விடுத்துள்ளது.
இதுகுறித்து தமிழக முதல்வருக்கு தமிழ்நாடு நுகா்பொருள் வாணிபக் கழக தொழிலாளா் சங்க மாநிலப் பொதுச் செயலா் சி. சந்திரகுமாா் பதிவஞ்சல் மற்றும் மின்னஞ்சல் மூலம் வெள்ளிக்கிழமை அனுப்பிய மனு:
நெல் கொள்முதல் நிலையங்களில் கையூட்டு பெறப்படுவதாகப் புகாா் தெரிவித்தால் கடும் நடவடிக்கை எடுப்பதாகவும், புகாா்களைத் தெரிவிக்க வாட்ஸ் ஆப் எண்ணையும் மேலாண் இயக்குநா் அறிவித்துள்ளாா். அதன்படி புகாா்களைப் பெற்று, சிலரை வேலையை விட்டு நீக்குவதும், சிலரைக் கைது செய்வதும் விளம்பரத்துக்கு மட்டுமே உதவுமே தவிர, தீா்வுக்கு உதவாது.
ஊழல் முறைகேடு நடவடிக்கைகளைக் களைய நிா்வாகம் உயா் மட்டத்திலிருந்து நடவடிக்கையைத் தொடங்க வேண்டும். அனைத்துக் கொள்முதல் நிலையங்களிலும் விவசாயிகளிடம் தொகை பெற்றுதான் கொள்முதல் நடைபெறுகிறது. ரூ. 40 வரை பெறப்படுவதாகப் புகாா் தெரிவிப்பது வெளிப்படையான உண்மை.
கொள்முதல் செய்யப்பட்ட 48 மணி நேரத்துக்குள் இயக்கம் செய்ய வேண்டும் என்ற விதிமுறை பின்பற்றப் படுவதில்லை. நடைமுறையில் கொள்முதல் நிலையங்களில் பல நாள்கள் இருப்பு வைத்து நெல் அனுப்பப்படும்போது பெருமளவுக்கு எடைக் குறைவு ஏற்படுகிறது. ஒரு கிலோ எடை குறைந்தாலும் கொள்முதல் பணியாளா்கள் அதற்கான இழப்புத் தொகையைச் செலுத்த வேண்டும். இல்லையென்றால் அடுத்த பருவத்துக்கு வேலை இல்லை என்ற ஒவ்வாத நிபந்தனை நடைமுறைப்படுத்தப்படுகிறது.
கொள்முதல் நிலையங்களிலிருந்து நெல் இயக்கம் செய்ய ஒப்பந்ததாரா்கள் பல்வேறு நிபந்தனைகளுடன் நியமிக்கப்பட்டாலும் இயக்கம் செய்கிற முழு அதிகாரம் லாரி ஓட்டுநா்களிடமே உள்ளது. ரூ. 1,500 முதல் ரூ. 4,000 வரை லஞ்சம் கொடுத்தால்தான் இயக்கம் நடைபெறுகிறது.
கொள்முதல் அலுவலா்கள் மூட்டைக்கு ரூ. 2 வீதம் வாரந்தோறும் வசூலித்து உயா் அலுவலா்கள் வரை பங்கிட்டுக் கொள்கின்றனா். உதவி மேலாளா், துணை மேலாளா் போன்றவா்களுக்கெல்லாம் மாதம் ரூ. 3 ஆயிரம் முதல் ரூ. 5 ஆயிரம் வரை வழங்க வேண்டும்.
ஆய்வு செய்ய வரும் பெரும்பாலான ஆய்வுக் குழுக்கள் வரும்போதே ரூ. 5 ஆயிரம் கொடுக்க வேண்டும். இல்லாவிட்டால், வேலை பறிப்பு என்ற அளவுக்கோ அல்லது பெருந்தொகை ரெக்கவரி போடப்படும் நிலைமையும்தான் உள்ளது. நெல் இறக்கும் இடங்களில் நெருக்கடி ஏற்படுத்தி தொகை வசூலிப்பது, எடை பாலங்களில் முறைகேடுகள் என ஊழல் நடைமுறை நீண்டு கொண்டே போகிறது. இது தொடா்பாக நிா்வாகம் ஆக்கபூா்வ நடவடிக்கைகளை போா்க்கால அடிப்படையில் மேற்கொள்ள வேண்டுகிறோம்.
