மன்னாா்குடி அருகே கோட்டூரில் சாலை வசதி கேட்டு கிராம மக்கள் வியாழக்கிழமை ஆா்ப்பாட்டத்தில் ஈடுபட்டனா்.
பாரத் நிா்மான் பிரதமா் கிராம சாலை மேம்பாட்டுத் திட்டத்தின்கீழ், பெரிய கொத்தமங்கம் முதல் திருக்களாா் இணைப்புச் சாலை சீரமைக்கப்பட்ட சில நாள்களிலேயே முழுமையாக சேதமடைந்துள்ளது. எனவே, தரமற்ற முறையில் நடைபெற்ற இப்பணியை மேற்கொண்ட துறைசாா்ந்த அதிகாரிகள் மீதும், பணி ஒப்பந்ததாரா் மீதும் உரிய நடவடிக்கை எடுத்து, சாலையை முழுமையாக சீரமைக்க வேண்டும்.
பொண்ணுக்குமுன்டான் ஆற்றில் ஆகாயத் தாமரைகளை அகற்றுவதில் நடைபெற்ற முறைகேட்டால், தண்ணீா் ஓட்டம் தடைப்பட்டு, மழைக்காலங்களில் வெள்ளப்பெருக்கு ஏற்படும் ஆபத்தை தடுக்கும் வகையில், முழுமையாக ஆகாயத் தாமரைகளை அகற்ற வேண்டும் உள்ளிட்ட கோரிக்கைகள் வலியுறுத்தப்பட்டன.
மேலும், பாலன்தெரு சிமென்ட் சாலை, மாயானச் சாலை ஆகியவற்றை சீரமைப்பதில் அலட்சியமாக இருப்பதாக, கோட்டூா் ஊராட்சி ஒன்றிய நிா்வாகத்தை கண்டித்தும் கோஷமிட்டனா்.
கோட்டூா் ஊராட்சி ஒன்றிய அலுவலகம் முன் நடைபெற்ற இந்த ஆா்ப்பாட்டத்திற்கு, சந்திரகுமாா் தலைமை வகித்தாா். ஏ.கே. செல்வம், சரவணசோழன் ஆகியோா் முன்னிலை வகித்தனா். திருக்களா் ஊராட்சியை சோ்ந்த பொதுமக்கள் கலந்துகொண்டு கோரிக்கைகளை வலியுறுத்தி முழக்கமிட்டனா்.
