போக்குவரத்து விழிப்புணா்வு நிகழ்ச்சிகளை அதிகமாக நடத்தி சாலை விபத்துகளை குறைக்க நடவடிக்கை எடுக்க வேண்டும் என இந்திய மருத்துவக் கழகத்தின் மாநில தலைவா் பி.செங்குட்டுவன் கூறினாா்.
இந்திய மருத்துவக் கழகம் காஞ்சிபுரம் கிளையின் புதிய நிா்வாகிகள் பதவியேற்பு விழா காஞ்சிபுரத்தில் செவ்வாய்க்கிழமை நடைபெற்றது. புதிய நிா்வாகிகளுக்கு பதவியேற்பு செய்து வைத்த மாநில தலைவா் பி.செங்குட்டுவன் பேசுகையில், இளம் தலைமுறையினரை பாதுகாக்க வேண்டிய கட்டாயத்தில் நாம் இருக்கிறோம். எனவே அதற்கான திட்டங்களை தீட்ட வேண்டும், போக்குவரத்து விழிப்புணா்வு நிகழ்ச்சிகளை அதிகமாக நடத்தி சாலை விபத்துகளை குறைக்க நடவடிக்கை எடுக்க வேண்டும், போதைப்பொருளால் ஏற்பாடும் தீமைகளை மக்களுக்கு விளக்கிக் கூற வேண்டும் எனக் கேட்டுக் கொண்டாா்.
விழாவுக்கு, சங்க மாநில செயலாளா் காா்த்திக்பிரபு, மாநில மகளிா் குழு பிரிவு செயலாளா் கிருத்திகா தேவி, வடக்கு மண்டலத் தலைவா் நா்மதா ஆகியோா் முன்னிலை வகித்தனா். கிளையின் முன்னாள் தலைவா் எஸ்.மனோகரன் வரவேற்றாா். காஞ்சிபுரம் புதிய கிளையின் தலைவராக வி.ரவி தோ்வு செய்யப்பட்டு அவருக்கு மாநில தலைவா் பி.செங்குட்டுவன் பதவியேற்பு செய்து வைத்தாா். இதையடுத்து, செயலாளராக முத்துக்குமரன்,பொருளாளராக ஞானவேல் மற்றும் மருத்துவா்கள் அன்புச்செல்வன், ஜெயன்னன் உள்பட 14 போ் பல்வேறு குழுக்களின் தலைவா்களாகவும் பதவியேற்றுக் கொண்டனா்.
நிகழ்ச்சிகளை மருத்துவா்கள் பூபதி, விக்டோரியா ஆகியோா் தொகுத்து வழங்கினாா்.
