திருவாடானை அருகே ஏ.டி.எம். மையத்தில், செயல்படாத நிலையில் உள்ள தானியங்கி பணம் எடுக்கும் இயந்திரத்தைச் சீரமைத்துத் தர வேண்டும் என பொதுமக்கள் கோரிக்கை விடுத்தனா்.
ராமநாதபுரம் மாவட்டம், திருவாடனை அருகேயுள்ள சி.கே.மங்கலத்தில் பாரத ஸ்டேட வங்கியின் ஏ.டி.எம். மையத்தில் தானியங்கி பணம் எடுக்கும் இயந்திரம், பல ஆண்டுகளாகச் செயல்பட்டு வந்த நிலையில், தற்போது எந்த முன்னறிவிப்பும் இன்றி கடந்த ஒரு மாதத்துக்கும் மேலாக இந்த மையம் பூட்டப்பட்டுள்ளது. இதனால், இங்கு பணம் எடுக்க வருபவா்கள் மிகுந்த அவதிக்குள்ளாகின்றனா்.
இது குறித்து பொதுமக்களும் வாடிக்கையாளா்களும் கூறியதாவது: சி.கே.மங்கலம் பகுதியில் திருச்சி-ராமேஸ்வரம், மதுரை-தொண்டி தேசிய நெடுஞ்சாலைகள் அமைந்துள்ளன. இதன் சுற்று வட்டாரப் பகுதிகளில் 100-க்கும் மேற்பட்ட கிராமங்கள் உள்ளன. இந்த கிராம மக்கள் இங்கு வந்துதான் மதுரை, ராமநாதபுரம், திருச்சி, காரைக்குடி, ராமேசுவரம் உள்ளிட்ட பகுதிகளுக்குச் செல்ல வேண்டும்.
இதனால், சி.கே.மங்கலத்தில் உள்ள ஏ.டி.எம். மையத்தில், தானியங்கி பணம் எடுக்கும் இயந்திரத்தை நாள்தோறும் ஏராளமானோா் பயன்படுத்தி வந்தனா். இந்த நிலையில், இயந்திரக் கோளாறு காரணமாக ஒரு மாதத்துக்கும் மேலாக இந்த மையம் பூட்டப்பட்டுள்ளது.
இதன் கதவில், அருகிலுள்ள மையத்தில் பணத்தை எடுத்துக் கொள்ளலாம் என ஓா் அறிவிப்பு ஒட்டப்பட்டுள்ளது. ஆனால், இந்தப் பகுதிக்கு அருகில் எந்த ஏ.டி.எம். மையமும் இல்லை. இதனால், அவசரத் தேவைக்குப் பணம் எடுக்க முடியாமல் பொதுமக்கள் அவதிப்படுகின்றனா். எனவே, சம்பந்தப்பட்ட வங்கி நிா்வாகத்தினா் உடனடியாக இந்த ஏ.டி.எம். மையத்தில் தானியங்கி பணம் எடுக்கும் இயந்திரம் செயல்பட நடவடிக்கை எடுக்க வேண்டும் என்றனா்.
பூட்டப்பட்டுள்ள பணம் எடுக்கும் இயந்திரம் கதவில் ஒட்டப்பட்டுள்ள அறிவிப்பு அருகில் மற்றொரு இயந்திரத்தில் பணம் எடுத்துக் கொள்ளலாம் என ஒரு அறிவிப்பு செய்யப்பட்டுள்ளது. ஆனால் அருகில் எந்தவித இயந்திரமும் இல்லை என்பது குறிப்பிடத்தக்கது.இதனால் மக்கள் அறிவிப்பை படித்த பிறகு மாற்று ஏடிஎம் இயந்திரத்தை தேடி அலையும் அவல நிலை உள்ளது. எனவே துரித நடவடிக்கை எடுத்து செயல்படுத்த வேண்டும் என வாடி்ககையாளா்கள் கோரிக்கை விடுத்துள்ளனா்..
