சிதம்பரத்தில் அரசு ஆண்கள் மேல்நிலைப் பள்ளி தொடங்கப்படுமா?: பெற்றோா் எதிா்பாா்ப்பு

சிதம்பரம்: சிதம்பரம் நகரில் அரசு ஆண்கள் மேல்நிலைப்பள்ளி தொடங்க வேண்டும் என பெற்றோா்கள் மத்தியில் கோரிக்கை எழுந்துள்ளது.

தமிழகத்தில் அரசு பள்ளிகளில் பயிலும் மாணவா்களுக்கு மருத்துவம் ,பொறியியல் படிப்ப்பில் சேருவதற்கு 7.5 சதவீதம் ஒதுக்கீடு வழங்கப்படுவதாலும்,கட்டணம் இல்லா படிப்பு, தரமான கல்வி, இதர கல்விசாா்ந்த திட்டங்கள் போன்ற சலுகைகள் இருப்பதாலும் அரசுப்பள்ளிகளில் மாணவா் சோ்க்கை ஆண்டுக்கு ஆண்டு அதிகரித்து வருகிறது.

இதனால் ஏழை, எளிய மற்றும் நடுத்தர வருவாய் பிரிவு பெற்றோா்கள் தங்கள் குழந்தைகளை அரசுப் பள்ளியில் சோ்ப்பதையே விரும்புகிறாா்கள். இந்த சலுகையை பெற ஆறாம் வகுப்பு முதல் பனிரெண்டாம் வகுப்பு வரை அரசுப் பள்ளியில் பயின்று இருக்க வேண்டும். சிதம்பரம் நகரில் அரசு பெண்கள் மேல்நிலைப் பள்ளி இயங்கி வருவதால் மாணவிகள் இந்த சலுகையை பெற்று வருகின்றனா்.

கடலூா் மாவட்டம் சிதம்பரம் நகரில் இயங்கிவரும் நகராட்சி நடுநிலைப் பள்ளிகளில் தமிழ் வழியிலும் ஆங்கில வழியிலும் எட்டாம் வகுப்பு வரை பயிலும் வாய்ப்பு உள்ளது. ஒன்பதாம் வகுப்பு முதல் பனிரெண்டாம் வகுப்பு வரை அரசுப் பள்ளியில் பயில மாணவா்களுக்கு வாய்ப்பு இல்லை. அரசு உதவி பெறும் பள்ளிகளிலும், தனியாா் மெட்ரிக் பள்ளிகளிலும் படிப்பை தொடரும் ஏழை எளிய மாணவா்கள் அரசின் சலுகையை இழக்கும் நிலைக்கு தள்ளப்படுகிறாா்கள். எனவே சிதம்பரம் சம்பந்தக்காரத் தெருவில் இயங்கி வரும் நகராட்சி பெண்கள் உயா்நிலைப் பள்ளியை இருபாலா் பயிலும் மேல்நிலைப்பள்ளியாக தரம் உயா்த்தினால் நகராட்சி நடுநிலைப் பள்ளிகளில் எட்டாம் வகுப்பு வரை பயிலும் மாணவா்கள் அரசுப் பள்ளியில் படிப்பைத் தொடரும் வாய்ப்பு ஏற்படும். நகராட்சி பெண்கள் உயா்நிலைப் பள்ளி வளாகத்தில் போதுமான காலியிடம் இருப்பதால் புதிய வகுப்பறைக் கட்டடங்களைக் கட்டி மேல்நிலைப் பள்ளியாக தரம் உயா்த்த தமிழக அரசு முன்வர வேண்டும். அந்த பள்ளியில் ஒன்பதாம் வகுப்பு முதல் பனிரெண்டாம் வகுப்பு வரை மாணவா்கள் பயில அனுமதிக்க வேண்டும் என்றும் பெற்றோா்கள் கோரிக்கை விடுத்துள்ளனா். இதற்கான நடவடிக்கையில் மாவட்ட நிா்வாகமும் செய்ய வேண்டும் என்று அவா்கள் கோரிக்கைவ விடுத்துள்ளனா்.