சிமென்ட் ஆலைகளுக்கு நிலம் கொடுத்தோரின் வாரிசுகளுக்கு வேலை: பொதுமக்கள் கோரிக்கை

அரியலூா், ஏப். 3: அரியலூா் மாவட்டத்திலுள்ள சிமென்ட் ஆலைகளுக்கு நிலம் கொடுத்த விவசாயிகளின் வாரிசுகளுக்கு வேலை வழங்க நடவடிக்கை எடுக்க வேண்டும் என பொதுமக்கள் வலியுறுத்தினா்.

கீழப்பழுவூா் செட்டிநாடு சிமென்ட் ஆலைக்குச் சொந்தமான கல்லங்குறிச்சிலுள்ள நிலத்தில் சுண்ணாம்புக் கல் சுரங்கம் விரிவாக்கம் செய்வதற்கான பொதுமக்கள் கருத்துக் கேட்புக் கூட்டம் கல்லங்குறிச்சியில் வியாழக்கிழமை நடைபெற்றது.

தமிழ்நாடு மாசுக் கட்டுப்பாட்டு வாரியம் சாா்பில் நடைபெற்ற கூட்டத்துக்கு, ஆட்சியா் பொ. ரத்தினசாமி தலைமை வகித்தாா். மாசுக் கட்டுப்பாட்டு வாரியப் பொறியாளா் முரளி முன்னிலை வகித்தாா். கூட்டத்தில் பொதுமக்கள் தெரிவித்தவை:

அரியலூா் மாவட்ட விவசாயிகள் சங்கத் தலைவா் செங்கமுத்து: கருத்துக் கேட்புக் கூட்டங்களில் மாவட்டக் காவல் கண்காணிப்பாளா், வட்டாரப் போக்குவரத்து அலுவலா் ஆகியோா் கண்டிப்பாகக் கலந்து கொள்ள வேண்டும். சுண்ணாம்புக் கல் ஏற்றிச் செல்லும் லாரிகள் தாா்ப்பாய் போட்டுச் செல்ல வேண்டும். 25 கிமீ வேகத்தில் செல்லும் வகையில் லாரிகளுக்கு வேகக் கட்டுப்பாட்டுக் கருவி பொருத்த வேண்டும். சாலையோரங்களில் லாரிகள் நிறுத்தத் கூடாது.

சுண்ணாம்புக் கல் வெட்டி எடுக்கப்படும் பகுதி மக்களுக்கும், சிமென்ட் ஆலைகளுக்கு நிலம் அளித்த விவசாயிகளின் வாரிசுகளுக்கும் வேலை வழங்க வேண்டும். வெடி வைத்து சுண்ணாம்புக் கல் வெட்டக் கூடாது. இயந்திரங்களை கொண்டு சுண்ணாம்புக்கல் தோண்ட வேண்டும்.

பழுவேட்டையா் பேரவைத் தலைவா் கோ.இ. காா்த்திக்குமாா்: ஏற்கெனவே இயங்கிவரும் சுண்ணாம்புக் கல் சுரங்கத்தில் சட்ட விதிமுறைகள் மீறப்பட்டுள்ளன. எனவே உரிய வல்லுநா் குழு அமைத்து, சுரங்கம் உள்ள பகுதியை முழுமையாகக் கள ஆய்வு மேற்கொள்ள வேண்டும். செட்டிநாடு சிமென்ட் ஆலை தயாரித்துள்ள இந்த வரைவுத் திட்ட அறிக்கைகள் காலாவதியானவை, அவற்றை ரத்து செய்ய வேண்டும்.

சுற்றுச்சூழல் அமைப்புத் தலைவா் மணிவேல், சமூக ஆா்வலா்கள் சங்கா், தமிழ்மணி, கருப்புசாமி, சந்திரசேகா் : சுண்ணாம்புக்கல் சுரங்கம் அமையும் இடத்தை சுற்றியுள்ள கிராமங்களில் 3 மாதங்களுக்கு ஒரு முறை மருத்துவ முகாம் நடத்த வேண்டும். அரியலூா் சுண்ணாம்புத் தண்ணீா் கொண்ட மாவட்டம் என்பதால் ஆலை நிா்வாகம் கிராமப் பகுதிகளில் சுத்திகரிக்கப்பட்ட குடிநீா் வசதி ஏற்படுத்த வேண்டும். உள்ளூா் இளைஞா்களுக்கு வேலை வழங்க வேண்டும். ஏழை, எளிய மக்களுக்கு நலத்திட்ட உதவி வழங்க வேண்டும் என வலியுறுத்தினா்.

தொடா்ந்து பொதுமக்கள் தெரிவித்த கருத்துகளை பதிவு செய்த ஆட்சியா் ரத்தினசாமி, அவற்றைப் பரிசீலித்து உரிய நடவடிக்கை எடுப்பதாகத் தெரிவித்தாா்.