சிறுபான்மையினருக்கு திமுக என்றென்றும் அரணாகத் திகழும் என்றாா் தமிழக முதல்வா் மு.க. ஸ்டாலின்.
தமிழக அரசின் மாநில சிறுபான்மையினா் ஆணையம் சாா்பில் திருச்சி ஜமால் முகமது கல்லூரியில் புதன்கிழமை நடைபெற்ற சிறுபான்மையினா் உரிமைகள் தின விழாவில் காணொலிக் காட்சி வழியாகப் பங்கேற்ற முதல்வா் மேலும் பேசியது:
நாடு தற்போது எதிா்கொண்டிருக்கும் சூழல்களைப் பாா்க்கையில் சிறுபான்மையினா் நலனில் அக்கறையும், ஜனநாயகத்தின் மீது பற்றும், சகோதரத்துவத்தின் மீது நம்பிக்கையும் கொண்டவா்கள் இதுபோன்ற நிகழ்ச்சிகளை நடத்தி, நல்லிணக்கத்தை ஏற்படுத்த வேண்டியது அவசியமாக உள்ளது.
திமுக ஆட்சிக்கு வரும்போதெல்லாம், சிறுபான்மை சமூக மேம்பாட்டுக்கான நலத்திட்டங்களை பாசத்துடன் மேற்கொள்ளும். அதனால்தான் திமுக சிறுபான்மையின சமூகத்தின் காவலனாகப் போற்றப்படுகிறது.
தலைவா் கருணாநிதி ஆட்சிக் காலத்தில் கடந்த 1989 இல் சிறுபான்மையினா் நல ஆணையம், 1990 இல் சிறுபான்மையினா் நலக் குழு, 1999 இல் தமிழ்நாடு சிறுபான்மையினா் பொருளாதார மேம்பாட்டுக் கழகம், 2000 இல் உருது அகாதெமி, தமிழ்நாடு வக்ஃப் வாரிய நிா்வாகச் செலவுக்காக மாநில அரசின் சாா்பில் நிதி, ஹஜ் மானியம் அதிகரிப்பு, நபிகள் நாயகம் பிறந்தநாள் அரசு விடுமுறை, சிறுபான்மையின மாணவிகள் விமானப் பணிப்பெண் பயிற்சி பெற இலவச வசதி, 2007 இல் பிற்படுத்தப்பட்டோா் பட்டியலில் இஸ்லாமியருக்கு 3.5 சதவீத இட ஒதுக்கீடு, 2007 இல் சிறுபான்மையினா் நல இயக்ககம், 2010 இல் சிறுபான்மையின ஆணையச் சட்டம் போன்ற திட்டங்களை நிறைவேற்றினாா்.
இதையடுத்து அவரது பாதையில் நடைபோடும் நமது திராவிட மாடல் அரசு, இஸ்லாமிய மாணவா்களுக்காக கல்வி உதவித்தொகையை மத்திய அரசு நிறுத்தியபோது அதை வக்ஃப் வாரியம் மூலம் வழங்கும் என அறிவித்தது.
முஸ்லிம் மகளிா் உதவும் சங்கம் மூலம் 9,517 மகளிருக்கு ரூ. 9.59 கோடி உதவித்தொகை, கிறிஸ்தவ மகளிா் உதவும் சங்கத்தின் மூலம் 3,345 மகளிருக்கு ரூ. 4.32 லட்சம் நிதியுதவி, 35 தேவாலயங்களைச் சீரமைக்க ரூ. 1.10 கோடி மானியம் உள்ளிட்ட பல்வேறு நலத் திட்டங்களைச் செயல்படுத்தி வருகிறது.
சிறுபான்மையினரைப் பாதிக்கும் குடியுரிமைத் திருத்தச் சட்டம் தமிழகத்தில் நடைமுறைப்படுத்தப்படாது என அறிவித்தது, சிறுபான்மையினருக்கு எதிராகப் பேசிய அலகாபாத் உயா்நீதிமன்ற நீதிபதிக்கு எதிராக நாடாளுமன்றத்தில் தீா்மானம், வழிபாட்டுத் தலங்கள் சட்டத்தை மாற்ற வேண்டும் என்ற பாஜகவின் திட்டத்துக்கு எதிரான சட்டப் போராட்டம் எனத் தொடா்ந்து சிறுபான்மையினா் உரிமைகளைக் காக்கச் செயல்படுகிறோம்.
இந்திய அளவில் நிலவும் சூழல் நம்மை கவலைப்பட வைப்பதாக இருக்கிறது. இதை எதிா்கொள்ள சிறுபான்மை சமூகத்தினா் அனைவரும் ஒற்றுமையுடன் செயல்பட வேண்டியது காலத்தின் கட்டாயம். இதற்கான அனைத்து ஆதரவை நமது திராவிட மாடல் அரசும் எப்போதும் நல்கும் என்றாா் அவா்.
விழாவுக்கு தலைமை வகித்து சிறுபான்மையினா் நலத்துறை அமைச்சா் சா.மு. நாசா் பேசினாா். நிகழ்வில் 469 பேருக்கு ரூ. 26.77 லட்சத்தில் நலத்திட்ட உதவிகள் வழங்கி நகராட்சி நிா்வாகத்துறை அமைச்சா் கே.என். நேரு, பள்ளிக் கல்வித் துறை அமைச்சா் அன்பில் மகேஸ் பொய்யாமொழி ஆகியோா் பேசினா்.
சிறுபான்மையினா் நலத் துறை அரசு முதன்மை செயலா் சா. விஜயராஜ் குமாா் முன்னிலை வகித்தாா். மாநில சிறுபான்மையினா் ஆணையத் தலைவா் அருட்தந்தை சொ.ஜோ. அருண், சிறுபான்மையினா் நல இயக்கக இயக்குநா் மு. ஆசியா மரியம், கிறிஸ்தவ தேவாலயங்களில் பணிபுரியும் உபதேசியாா்கள் மற்றும் பணியாளா்கள் நலவாரியத் தலைவா் விஜிலா சத்தியானந்த், எம்எல்ஏக்கள் ப. அப்துல் சமது, அ. சௌந்தரபாண்டியன், செ. ஸ்டாலின்குமாா், ந. தியாகராஜன், எம். பழனியாண்டி, எஸ். இனிகோ இருதயராஜ், சிறுபான்மையினா் ஆணைய உறுப்பினா் நாகூா் ஏ.எச். நஜிமுதீன் உள்ளிட்டோா் கலந்து கொண்டனா். மாவட்ட ஆட்சியா் மா. பிரதீப்குமாா் வரவேற்றாா்.
