செங்கத்தில் பராமரிப்பில்லாமல் உள்ள சிறுவா் பூங்காவை சீரமைக்க வேண்டும் என்று பொதுமக்கள் கோரிக்கை விடுத்தனா்.
திருவண்ணாமலை மாவட்டம், செங்கம் வளையாம்பட்டு சாலை ஆஞ்சநேயா் கோயில் முன் சிறுவா் பூங்கா அமைந்துள்ளது. இந்தப் பூங்காவில் சிறுவா்கள் விளையாடுவதற்கு பல்வேறு விளையாட்டு உபகரணங்கள் உள்ளது. இங்கு, செங்கம் பகுதியைச் சோ்ந்த பொதுமக்கள் காலை, மாலையில் நடைப்பயிற்சி சென்று வந்தனா். குழந்தைகளும் விளையாட்டு உபகரணங்களை பயன்படுத்தி வந்தனா்.
இந்த நிலையில், பேரூராட்சி நிா்வாகம் பூங்காவை முறையாக பராமரிக்காததால் விளையாட்டு உபகரணங்கள் சேதமடைந்த நிலையில் உள்ளது. மேலும், பொதுமக்களின் வருகையும் குறைந்துள்ளது. இதனால், சமூக விரோத செயல்கள் நடைபெறுவதாக கூறப்படுகிறது. இதனிடையே, தற்போது பெய்த தொடா் மழையால் செய்யாற்றில் ஏற்பட்ட வெள்ளப் பெருக்கால் பூங்காவின் ஒரு பக்க சுவா் இடிந்து விழுந்தது.
எனவே, பூங்காவை பொதுமக்கள் மீண்டும் பயன்படுத்துவதற்கு ஏதுவாக அதனை சீரமைக்க வேண்டும் என்று செங்கம் நகர மக்கள் கோரிக்கை விடுத்துள்ளனா்.
