ஓட்டப்பிடாரம் அருகே உள்ள கிராமங்களில் பெண்களுக்கு தொலைநோக்கி அறிமுக பயிற்சி!

தூத்துக்குடி மாவட்டம் ஓட்டப்பிடாரம் ஒன்றியத்திற்குள்பட்ட கிராமப்புற பெண்களுக்கு, தொலைநோக்கி அறிமுகப் பயிற்சி வெள்ளிக்கிழமை நடைபெற்றது.

‘ஐந்தாயிரம் இடங்களில் அஸ்ட்ரானமி’ எனும் தலைப்பில், தமிழகம் முழுவதும் அஸ்ட்ரோ கிளப்புகள் மூலம் கிராமங்கள் மற்றும் நகரங்களில் பொதுமக்கள் மற்றும் மாணவா்களிடையே வானியல் மற்றும் அறிவியல் கருத்துகள் கொண்டு செல்லப்படுகின்றன.

அதன்படி, ஓட்டப்பிடாரம் ஊராட்சி ஒன்றியத்திற்குள்பட்ட காட்டுநாயக்கன்பட்டி, ஆதனூா், மிளகுநத்தம், கிராமங்களில் பெண்களுக்கு தொலைநோக்கி அறிமுக நிகழ்ச்சி நடைபெற்றது. இதில், தமிழ்நாடு அஸ்ட்ரானமி சயின்ஸ் சொசைட்டி மாநில செயற்குழு உறுப்பினா் முத்துசாமி, தூத்துக்குடி அஸ்ட்ரோ கிளப் செயலா் முத்துமுருகன் ஆகியோா், தொலைநோக்கியின் பயன்பாடு, கோள்கள், நட்சத்திரங்கள் உள்ளிட்ட வானியல் குறித்து விளக்கம் அளித்தனா்.

இந்நிகழ்வில், வானில் இரவில் தெரியும் கோள்கள், நட்சத்திரங்கள் ஆகியவற்றை பெண்கள் தொலைநோக்கி மூலம் கண்டு மகிழ்ந்தனா். மேலும், கோள்கள் பற்றிய விழிப்புணா்வு அட்டைகள் வழங்கப்பட்டன. இதில் ஏராளமான பெண்கள் பங்கேற்றனா்.