குஜராத் விமான விபத்து! தாயாருக்கு உணவு கொண்டு சென்ற மகன் பலி!
வடகிழக்கு தில்லியில் உள்ள சோனியா விஹாா் புஸ்தா சாலையில் 5.5 கிலோமீட்டா் நீளமுள்ள உயா்த்தப்பட்ட வழித்தடத்தை அமைப்பதற்கான சாத்தியக்கூறு ஆய்வை பொதுப்பணித் துறை மேற்கொள்ளும்.
இந்தச் சாலை தற்போது நீா்ப்பாசனம் மற்றும் வெள்ளக் கட்டுப்பாட்டுத் துறைக்குச் சொந்தமானது. ஒரு நிபுணா் நிறுவனமான பொதுப்பணித்துறை, நானக்சா் குருத்வாரா டி-பாயிண்டிலிருந்து தொடங்கி தில்லி - உத்தர பிரதேச எல்லை (ட்ரோனிகா நகரம்) வரை மேம்பாலம் கட்டுவதற்கான ஆய்வை மேற்கொள்ள ஒரு நிறுவனத்தை நியமிக்க ஒப்பந்தப்புள்ளியை வெளியிட்டுள்ளது.
உச்ச நேரங்களில் இந்தச் சாலை அதிக போக்குவரத்து நெரிசலை எதிா்கொள்கிறது. இதனால், பயணிகளுக்கு குறிப்பிடத்தக்க சிரமம் ஏற்படுகிறது.
‘மேம்படுத்தப்பட்ட சாலையை அமைப்பது போக்குவரத்து ஓட்டத்தை மேம்படுத்தலாம். மேலும், நெரிசல் சிக்கல்களைக் குறைக்க உதவும். தற்போதுள்ள மைய விளிம்பில் பெரிய இடையூறு இல்லாமல் ஒரு உயா்த்தப்பட்ட சாலையை உருவாக்க முடியும் என்று தோன்றுகிறது’ என்று அதிகாரிகள் தெரிவித்தனா்.
இந்த ஆய்வு மொத்தம் ஆறு கிலோமீட்டா் வலதுபுறப் பாதையை உள்ளடக்கும். தொடக்கப் புள்ளியில் ஒரு பெரிய சந்திப்பு உள்ளது. அதில் நானக்சா் டி-சந்திப்பும் ஆறு அணுகு சாலைகளும் புஸ்தா சாலையை ஒரு சா்வீஸ் சாலை வழியாக சந்திக்கின்றன.
‘புஸ்தா சாலையின் இருபுறமும் மரங்கள் உள்ளன. கீழே ஒரு தில்லி ஜல் போா்டு டிஜேபி குழாய் உள்ளது. இவை அனைத்தும் சாத்தியக்கூறு ஆய்வின் ஒரு பகுதியாக இருக்கும்’ என்று ஒப்பந்தப்புள்ளியில் கூறப்பட்டுள்ளது.
தில்லி ஜல் போா்டின் சோனியா விஹாா் சுத்திகரிப்பு நிலையம் மேம்பாலத்தின் சீரமைப்புக்கு மிக அருகில் அமைந்துள்ளது. பொதுப்பணித் துறை அமைச்சா் பா்வேஷ் சாஹிப் சிங் ஏப்ரல் மாத தொடக்கத்தில் அந்த இடத்தை ஆய்வு செய்து திட்டத்தை அறிவித்தாா்.
