'டேய் பாவிகளா... அண்ணன் அன்புமணியிடம் கேளுங்கள்!' - குமுறும் சேலம் பாமக எம்.எல்.ஏ அருள்

பாமகவில் உள்கட்சி விவகாரம் பூதாகரமாகி தந்தைக்கும் - மகனுக்கும் இடையே மிகப்பெரிய பிரச்னை போய்கொண்டிருக்கிறது. பாமக நிறுவனர் ராமதாஸ் பாமக தலைவர் அன்புமணியை சாட, அன்புமணி ராமதாஸிடம் மன்னிப்பு கேட்பது என காட்சிகள் நகர்ந்துகொண்டிருக்கின்றன.

நேற்று முன்தினம் (ஜூன் 18) பாமக எம்.எல்.ஏக்கள் அருள் மற்றும் ஜி.கே மணி நெஞ்சுவலி காரணமாக அடுத்தடுத்து மருத்துமனையில் அனுமதிக்கப்பட்டனர். இவர்களை நேரில் சென்று நலம் விசாரித்து வந்தார் ராமதாஸ்.

இன்னொரு பக்கம், நேற்று சேலம், தருமபுரி என பொதுக்குழு கூட்டத்தில் கலந்துகொண்டிருந்தார் அன்புமணி.

அண்ணன் அன்புமணியிடம் கேளுங்கள்

இந்த நிலையில், நேற்று சேலம் மேற்கு எம்.எல்.ஏ அருள் தனது எக்ஸ் பக்கத்தில் தொடர்ச்சியாக பதிவிட்டிருக்கிறார். அதில் அவர் குறிப்பிட்டிருப்பதாவது...

"டேய் பாவிகளா 35 ஆண்டுகளாக பாமகவுக்கு உழைத்து, 18 முறை சிறை கண்டேன். 135 நாட்கள் நானும் ரத்தினமும் சிறையில் இருந்தபோது, மும்பைக்கும், டெல்லிக்கும் ஓடியவர்கள் இன்று மேடையில் வீர வசனம் பேசியதை பார்த்து பலர் ஏளனமாக சிரித்ததை கண்டோம்".

"அச்சிரப்பாக்கம் இடைத்தேர்தலில் அண்ணன் அண்புமணியோடு தேர்தல் பிரச்சாரத்தில் இருந்தபோது பிறந்த எனது மகள் டாக்டர் எழிலை 28 நாட்களுக்கு பிறகே முதன்முதலில் பார்த்தேன். அண்ணன் அன்புமணியிடம் கேளுங்கள் அவர் அரசியலில் கால் பதித்த நாள் முதல் உடனிருப்பவன்".

நாடகப் முகநூல் போராளிகளே

"சாதியை, அய்யாவை கொச்சைப்படுத்திய கயவர்களை மெயின் ரோட்டில் துரத்தி துரத்தி விரட்டியவன்…

என்னையும், என் உழைப்பை, என் தியாகத்தையும், தாண்டி இந்த இயக்கத்திற்காக உங்களை அர்ப்பணித்த நாடகப் முகநூல் போராளிகளே ஆதாரத்துடன் வா நேரில் நேரலையில் விவாதிப்போம்..."

"என்னை பொறுத்தவரை மருத்துவர் அய்யாவும் மருத்துவர் சின்னய்யாவும் ஒன்று தான் ... உங்கள் சுய லாபத்திற்காக இருவரையும் பிரிக்காதீர் ...

கண்ணீருடன் ,

அருள் இராமதாஸ் MLA ,

சேலம் மாநகர மாவட்ட செயலாளர் ,

சேலம் மேற்கு சட்டமன்ற தொகுதி."