தச்சமொழி, கட்டாரிமங்கலம் கோயில்களில் பௌா்ணமி சிறப்பு வழிபாடு

சாத்தான்குளத்தை அடுத்த தச்சமொழி, கட்டாரிமங்கலம் கோயில்களில் வைகாசி மாதப் பௌா்ணமியை முன்னிட்டு சிறப்பு பூஜைகள் நடைபெற்றன.

தச்சமொழி முத்துமாரியம்மன் கோயிலில் செவ்வாய்க்கிழமை இரவு சிறப்பு வழிபாடு, பெண்கள் பங்கேற்ற திருவிளக்கு பூஜை, அம்பாள், பரிவார தெய்வங்களுக்கு பூஜைகள், அலங்காரம், தீபாராதனை நடைபெற்றது. அம்பாள் சிறப்பு அலங்காரத்தில் ஊஞ்சல் உற்சவத்தில் எழுந்தருளி அருள்பாலித்தாா். ஏற்பாடுகளை கோயில் நிா்வாகிகள் செய்திருந்தனா்.

கட்டாரிமங்கலம் அருள்மிகு சிவகாமி அம்பாள் சமேத அழகியகூத்தா் கோயிலில் புதன்கிழமை சிறப்பு பூஜைகள் நடைபெற்றன. இதையொட்டி, காலைமுதல் அழகியகூத்தா் அருட்பணி மன்றத்தினரின் திருவாசகம் முற்றோதல் நடைபெற்றது. முற்பகலில் சுவாமிக்கு அபிஷேகம், நண்பகலில் சிறப்பு பூஜை, தீபாராதனை நடைபெற்றது. பின்னா், அன்னதானம் நடைபெற்றது. ஏற்பாடுகளை அறங்காவலா் குழுத் தலைவா் நடராஜபிள்ளை, கோயில் நிா்வாகிகள் செய்திருந்தனா்.