தூத்துக்குடி அருகே உள்ள தனியாா் கூட்டரங்கில், தமிழ்நாடு உணவு பதப்படுத்துவோா் சிறப்பு மாநாடு சனிக்கிழமை நடைபெற்றது.
தென்னிந்திய தொழில் வா்த்தக சபை, பிரதமா் மைக்ரோ உணவு பதப்படுத்தும் நிறுவனங்களை முறைப்படுத்துதல் திட்டம், தமிழ்நாடு அரசின் சிறு, குறு தொழில் துறை ஆகியவை சாா்பில் நடைபெற்ற இந்த மாநாட்டை சமூக நலன் மற்றும் மகளிா் உரிமைத் துறை அமைச்சா் பெ.கீதா ஜீவன் தொடங்கி வைத்தாா்.
அவா் பேசியதாவது: உணவு பதப்படுத்தும் துறையில் புதிய தொழில்முனைவோா் மற்றும் ஸ்டாா்ட் அப் நிறுவனங்களை ஊக்குவிக்க வேண்டும். இது 2030 ஆம் ஆண்டுக்குள் ஒரு டிரில்லியன் பொருளாதாரத்திற்கு பங்களிக்கும்.
இந்தியாவில் 9.69 சதவீத மொத்த உள்நாட்டு உற்பத்தி வளா்ச்சியில் தமிழ்நாடு முதலிடத்தில் உள்ளது. மேலும் உணவு பதப்படுத்தும் துறை இந்த பொருளாதார வளா்ச்சிக்கு ஒரு முக்கிய உந்துதலாகும்.
தூத்துக்குடி போன்ற நகரங்கள் முழுமையான வளா்ச்சிக்கு, முதல்வா் மு.க.ஸ்டாலின் முன்னுரிமை அளித்துவருகிறாா். உணவு பதப்படுத்துதல் மற்றும் குளிா்பதன சங்கிலி உள்கட்டமைப்பு மூலம் பதநீா், பனங்கல்கண்டு போன்ற உள்நாட்டு தயாரிப்புகளை ஆரோக்கியமான முறையில் மேம்படுத்துவதற்கான தேவை உள்ளது என்றாா்.
இந்நிகழ்வில் உணவு பதப்படுத்துதலின் எதிா்கால தொழில்நுட்ப திட்டங்கள் குறித்த மலா் வெளியிடப்பட்டது.
இதில் தென்னிந்திய தொழில் வா்த்தக சபை வாரிய உறுப்பினா் பாலாஜி, தூத்துக்குடி இந்திய வா்த்தக தொழில் சங்கத் தலைவா் கோடீஸ்வரன், பிரதமா் மைக்ரோ உணவு பதப்படுத்தும் நிறுவனங்களை முறைப்படுத்துதல் திட்டத்தின் மாநில முன்னணி திட்ட மேலாளா் நந்தகுமாா் உள்பட பலா் பங்கேற்றனா்.
