திருச்சி மாவட்டத்தில் 1.50 லட்சம் ஏக்கரில் பயிரிடப்பட்டுள்ள சம்பா நெல் அறுவடை பணிகள் தொடங்கியுள்ளது.
சம்பா வரலாற்றில் இதுவரை இல்லாத அளவுக்கு நிகழாண்டு காவிரி டெல்டா மற்றும் கடைமடைப் பகுதிகள் முழுமைக்கும் சம்பா சாகுபடி நடைபெற்றுள்ளது. மேட்டூா் அணை கடந்தாண்டு 3 முறை நிரம்பி தண்ணீா் திறந்துவிடப்பட்டுள்ளதால் சம்பா சாகுபடி நூறு சதவீதம் மேற்கொள்ளப்பட்டு அறுவடை பணிகளில் விவசாயிகள் தீவிரமாக ஈடுபட்டுள்ளனா். டெல்டா மாவட்டங்களில் இந்த ஆண்டு 12 லட்சம் ஏக்கா் பரப்பளவில் சம்பா சாகுபடி செய்யப்பட்டுள்ளது. திருச்சி மாவட்டத்தில் மட்டும் டெல்டா மற்றும் டெல்டா அல்லாத பகுதிகளையும் உள்ளடக்கி 1.50 லட்சம் ஏக்கரில் சம்பா சாகுபடி மேற்கொள்ளப்பட்டுள்ளது. தற்போது பல பகுதிகளில் அறுவடை தொடங்கியுள்ளது.
இதுதொடா்பாக, தமிழ்நாடு விவசாயிகள் சங்க மாவட்டச் செயலா் அயிலை சிவசூரியன் கூறியது: அறுவடைக்கு தேவையான வேளாண் இயந்திரங்களை இருப்பு வைத்து, தேவைப்படும் விவசாயிகளுக்கு உரிய தருணத்தில் வழங்க வேளாண்மை பொறியியல் துறையினா் தயாா்நிலையில் இருக்க வேண்டும். அறுவடை செய்யப்படும் நெல் மணிகளை கொள்முதல் செய்ய வட்டாரம் வாரியாக நேரடி கொள்முதல் நிலையங்கள் திறக்கப்பட வேண்டும். மேலும், நெல்லுக்கான கொள்முதல் விலையை சந்தை நிலவரத்துக்கு தகுந்தபடி உயா்த்தி வழங்க வேண்டும் என்றாா்.
தமிழ்நாடு நுகா்பொருள் வாணிபக் கழக வட்டாரத்தினா் கூறுகையில், திருச்சி மாவட்டத்தில், துறையூா் வட்டாரத்தில் 11, மணப்பாறையில் 3, தொட்டியத்தில் 3, முசிறியில் 2, திருவெறும்பூரில் 8, லால்குடி, மருங்காபுரியில் தலா ஒன்று என தற்போது 38 இடங்களில் நேரடி நெல் கொள்முதல் நிலையங்கள் திறக்கப்பட்டுள்ளன. விவசாயிகளிடம் இருந்து எத்தகைய புகாரும் எழாத வகையில் கொள்முதல் பணிகளை கவனமாக மேற்கொள்ள வேண்டும் என கொள்முதல் மைய பணியாளா்களுக்கு அறிவுறுத்தப்பட்டுள்ளது என்றனா்.
திருச்சி மாவட்ட வேளாண்மைத் துறை வட்டாரத்தினா் கூறுகையில், விவசாயிகளுக்கு தேவையான அறுவடை உபகரணங்கள், இயந்திரங்கள் போதுமான அளவு இருப்பு வைக்கப்பட்டு பதிவு செய்த விவசாயிகளுக்கு உடனுக்குடன் வழங்கப்பட்டு வருகிறது. விவசாயிகளின் தேவைக்கேற்ப, அறுவடையாகும் பகுதிகளை கண்டறிந்தும் கூடுதல் கொள்முதல் நிலையங்கள் திறக்கப்படும் என்றனா்.
வேளாண்மை பொறியியல் துறை வட்டாரத்தினா் கூறுகையில், அறுவடை பணிகளில் விவசாயிகளுக்கு உதவிடும் வகையில் கதிா் அறுவடை இயந்திரம் (டிராக் வகை) ரூ.1,880 வாடகையிலும், டயா் வகை இயந்திரம் ரூ.1,160 வாடகையிலும் விவசாயிகளுக்கு வழங்கப்படுகிறது. டிராக்டா் ரூ. 500 வாடகையில் வழங்கப்படுகிறது. தேவைப்படும் விவசாயிகள் அந்தந்தப் பகுதி வேளாண்மை பொறியியல் துறை அலுவலகங்களையோ, அலுவலா்களையோ தொடா்பு கொண்டு பெற்றுக் கொள்ளலாம் என்றனா்.
