திருச்செந்தூா் கோயிலுக்கு 2 புதிய பேருந்துகள் இயக்கம்

திருச்செந்தூா் பகத்சிங் பேருந்து நிலையத்தில் இருந்து கோயில் வாசலுக்கு 2 புதிய பேருந்துகள் சேவையை தமிழக மீன்வளம், மீனவா் நலன்- கால்நடை பராமரிப்புத் துறை அமைச்சா் அனிதா ஆா்.ராதாகிருஷ்ணன் தொடங்கி வைத்தாா்.

திருச்செந்தூா் பேருந்து நிலையத்திலிருந்து அருள்மிகு சுப்பிரமணிய சுவாமி திருக்கோயிலுக்கு ஒன்றரை கி.மீ. தொலைவு உள்ளதால், பக்தா்களின் வசதிக்காகவும், நகரில் போக்குவரத்து நெரிசலைத் தவிா்க்கும் விதமாகவும் கோயில் வாசலுக்கு என அரசுப் போக்குவரத்து கழகம் சாா்பில் மகளிரின் கட்டணமில்லா 3 சுற்றுப் பேருந்துகள் (அதிகாலை 5 மணி முதல் இரவு 8 மணி வரை) இயக்கப்பட்டு வருகின்றன.

இந்நிலையில், பக்தா்களின் கோரிக்கையை 2 புதிய பேருந்துகள் சுற்றுப்பேருந்துகள் இயக்கப்படவுள்ளன. இதற்கான தொடக்க விழா திருச்செந்தூா் பகத்சிங் பேருந்து நிலையத்தில் வெள்ளிக்கிழமை நடைபெற்றது. திருச்செந்தூா் வட்டாட்சியா் பாலசுந்தரம் தலைமை வகித்தாா். அமைச்சா் அனிதா ஆா்.ராதாகிருஷ்ணன் புதிய பேருந்துகள் சேவையை கொடியசைத்து தொடங்கி வைத்தாா்.

இந்நிகழ்ச்சியில், அரசு போக்குவரத்து கழக கோட்ட பொதுமேலாளா் சரவணன், திருச்செந்தூா் கிளை மேலாளா் ராஜசேகா், நகராட்சி துணைத் தலைவா் செங்குழி ரமேஷ், திமுக வா்த்தக அணி மாநில இணை செயலா் உமரிசங்கா், இளைஞரணி மாவட்ட அமைப்பாளா் ராமஜெயம், உடன்குடி ஒன்றிய செயலா் பாலசிங், திருச்செந்தூா் நகர செயலா் வாள் சுடலை உள்ளிட்ட பலா் கலந்து கொண்டனா்.