திருமலையில் உள்ள தரிகொண்டா வெங்கமாம்பா அன்ன பிரசாத மையத்தில் உணவின் போது பக்தா்களுக்கு வடை விநியோகிக்கும் திட்டம் வியாழக்கிழமை தொடங்கப்பட்டது.
திருமலை ஏழுமலையான் தரிசனத்துக்காக வரும் பக்தா்களுக்கு காலை முதல் இரவு வரை தேவஸ்தானம் அன்னதானம் வழங்கி வருகிறது. அதில் பருப்பு வடை வழங்க முடிவு செய்து தேவஸ்தானம் கடந்த மாதம் சோதனை முறையில் அளித்து வந்தது. அதை தினசரி வழங்க முடிவு செய்து வியாழக்கிழமை முதல் தொடங்கியது.
தேவஸ்தான அறங்காவலா் குழுத் தலைவா் பி.ஆா்.நாயுடு, செயல் அதிகாரி சியாமளா ராவ் மற்றும் கூடுதல் செயல் அதிகாரி வெங்கையா சௌத்ரி ஆகியோருடன் இணைந்து வியாழக்கிழமை அன்ன தானத்தில் வடை வழங்கும் திட்டத்தை தொடங்கி வைத்தாா்.
இனிமேல், அன்ன பிரசாத மையத்தில் தினமும் காலை 10.30 மணி முதல் மாலை 4 மணி வரை பக்தா்களுக்கு 35,000 வடைகள் வழங்கப்படும் என தேவஸ்தான அறங்காவலா் குழுத் தலைவா் பி.ஆா். நாயுடு தெரிவித்தாா்.
எதிா்காலத்தில் இந்த எண்ணிக்கை மேலும் அதிகரிக்கப்படும், மேலும், பக்தா்களுக்கு சுவையான உணவுகள் வழங்கவும் தேவஸ்தானம் நடவடிக்கை மேற்கொண்டுள்ளது என்றும் அவா் கூறினாா்.
நிகழ்ச்சியில், அறங்காவலா் குழு உறுப்பினா் சாந்த ராம், துணை தலைமை நிா்வாக அதிகாரிகள் லோகநாதம், ராஜேந்திரா, கேட்டரிங் சிறப்பு அதிகாரி சாஸ்திரி உள்ளிட்டோா் கலந்து கொண்டனா்.
