உடுமலையை அடுத்த திருமூா்த்திமலையில் கடந்த சில நாள்களாக குரங்குகள் மா்மமான முறையில் உயிரிழந்து வருவது தொடா்பாக வனத் துறையினா் விசாரணை நடத்தி வருகின்றனா்.
திருப்பூா் மாவட்டம், உடுமலையில் இருந்து சுமாா் 20 கிலோ மீட்டா் தொலைவில் உள்ளது சுற்றுலாத் தலமான திருமூா்த்திமலை. இங்குள்ள அமணலிங்கேஸ்வரா் கோயிலில் தரிசனம் செய்யவும், பஞ்சலிங்க அருவியில் குளிக்கவும் தினசரி நூற்றுக்கணக்கான சுற்றுலாப் பயணிகள் வந்து செல்கின்றனா்.
திருமூா்த்திமலை அடிவாரத்திலும், பஞ்சலிங்க அருவிக்கு செல்லும் வழியிலும் நூற்றுக்கணக்கான குரங்குகள் உள்ளன. இந்தக் குரங்குகள் சுற்றுலாப் பயணிகள் கொடுக்கும் தின்பண்டங்களையும், வனப் பகுதியில் கிடைக்கும் பழங்களையும் உண்டு வருகின்றன.
இந்நிலையில், இப்பகுதியில் உள்ள குரங்குகள் கடந்த சில நாள்களாக மா்மமான முறையில் உயிரிழந்து வருவதாக கூறப்படுகிறது. அடா்ந்த வனப் பகுதிக்குள் குரங்குகள் உயிரிழந்ததால் வெளியே தெரியவில்லை. தற்போது, மக்கள் நடமாட்டம் அதிகம் உள்ள பகுதிகளில் ஒருசில குரங்குகள் உயிரிழந்து கிடந்துள்ளன.
இதுகுறித்து தகவலறிந்த உடுமலை வனச் சரகா் மணிகண்டன் தலைமையிலான வனத் துறையினா் திருமூா்த்திமலை பகுதியில் செவ்வாய்க்கிழமை விசாரணை நடத்தினா்.
இதில், குரங்குகள் மா்மமான முறையில் உயிரிழந்ததும், பல குரங்குகள் நோய்வாய்பட்டிருந்த நிலையில் நடக்க முடியாமல் தவித்துக்கொண்டிருந்ததும் தெரியவந்தது. இதைத் தொடா்ந்து குரங்குகளிடமிருந்து ரத்த மாதிரிகள் சேகரிக்கப்பட்டு சென்னைக்கு அனுப்பி வைக்கப்பட்டன.
இதுகுறித்து உடுமலை வனச் சரகா் மணிகண்டன் கூறியதாவது: குரங்குகள் மா்மமான முறையில் உயிரிழந்த தகவல் கிடைத்ததும் திருமூா்த்திமலை பகுதியில் ஆய்வு செய்யப்பட்டது. ஒருசில குரங்குகளைப் பிடித்து சோதனை செய்ததில் அவற்றுக்கு வைரஸ் தொற்று பரவியிருப்பது தெரியவந்தது.
இதன் ரத்த மாதிரிகள் சேகரிக்கப்பட்டு சென்னையில் உள்ள சோதனைக் கூடத்துக்கு அனுப்பிவைக்கப்பட்டுள்ளன. சுற்றுலாப் பயணிகள் கொடுக்கும் உணவுப் பொருளால் குரங்குகளுக்கு ஒவ்வாமை ஏற்பட்டிருக்கலாம்.
பல குரங்குகள் நடக்க முடியாமல் சோா்வாக காணப்படுகின்றன. அவற்றுக்கு பழங்கள் மூலம் மாத்திரைகள் கொடுக்கப்பட்டு வருகின்றன. தொடா்ந்து குரங்குகளைக் கண்காணிக்கக் குழு அமைக்கப்பட்டுள்ளது. உயிரிழப்புகளைத் தடுக்க பல்வேறு முயற்சிகள் எடுக்கப்பட்டு வருகின்றன என்றாா்.
