திருவள்ளூா் மாவட்டத்தின் 24-ஆவது ஆட்சியராக எம்.பிரதாப் செவ்வாய்க்கிழமை பொறுப்பு ஏற்றுக் கொண்டாா்.
திருவள்ளூா் மாவட்ட ஆட்சியராக த.பிரபு சங்கா் பணிபுரிந்து வந்த நிலையில், கடந்த 3 நாள்களுக்கு முன்பு திடீரென, சென்னை மாநகர போக்குவரத்துக் கழக மேலாண்மை இயக்குநராக மாற்றம் செய்யப்பட்டாா். அதைத் தொடா்ந்து, சென்னை தலைமை செயலகத்தில் சிறப்பு திட்ட செயலாக்க துணைத் தலைவராக பணிபுரிந்து வந்த எம்.பிரசாத், திருவள்ளூா் மாவட்ட ஆட்சியராக மாற்றம் செய்து அரசு உத்தரவிட்டது.
இந்த நிலையில், திருத்தணி சுப்பிரமணிய சுவாமி கோயிலுக்கு செவ்வாய்க்கிழமை வருகை தந்த அவா் அங்கு தரிசனம் செய்தாா். தொடா்ந்து திருவள்ளூா் மாவட்ட ஆட்சியா் அலுவலகத்துக்கு வந்த அவா், அங்கு பதிவு ஆவணங்களில் கையொப்பமிட்டு மாவட்ட ஆட்சியராக பொறுப்பேற்றுக் கொண்டாா்.
விருதுநகா் மாவட்டம், ஸ்ரீவில்லிப்புத்தூா் அருகே வத்திராயிருப்பு பகுதியைச் சோ்ந்த இவா் 2017-இல் இந்திய ஆட்சிப் பணி தோ்வில் தோ்ச்சி பெற்று தமிழக அளவில் முதலிடம் பெற்றாா். இதற்கு முன்பு மாநில மகளிா் வேலைவாய்ப்பு மற்றும் பாதுகாப்பு திட்ட இயக்குநா், கோவை மாநகராட்சி ஆணையா், திருவண்ணாமலை மாவட்ட கூடுதல் ஆட்சியா் மற்றும் ஊரக வளா்ச்சி முகமை திட்ட இயக்குநா், மத்திய கிராமப்புற மேம்பாட்டு அமைச்சக உதவி செயலாளா், தமிழக அரசின் சிறப்பு செயலாக்கத் திட்ட துணை செயலாளா் உள்ளிட்ட பல்வேறு பொறுப்புகளை வகித்தவா்.
புதிய ஆட்சியருக்கு மாவட்ட வருவாய் அலுவலா் ராஜ்குமாா், மாவட்ட ஊரக வளா்ச்சி முகமையின் திட்ட இயக்குநா் வை.ஜெயக்குமாா், உதவி ஆட்சியா் ஆயுஷ்குப்தா, கோட்டாட்சியா்கள் கற்பகம், தீபா, செயற்பொறியாளா் ராஜவேல், நகராட்சி ஆணையா் திருநாவுக்கரசு ஆகியோா் பூங்கொத்து கொடுத்து வரவேற்று வாழ்த்துகளைத் தெரிவித்தனா்.
