திருவாரூரில் பாரம்பரிய நெல் பரிசோதனை மையம் அமைக்கப்படும்: அமைச்சா் டி.ஆா்.பி. ராஜா

திருவாரூா் மாவட்டத்தில் பாரம்பரிய நெல் ரகங்கள் பரிசோதனை மையம் அமைக்கப்படும் என தமிழக தொழில் முதலீட்டு ஊக்குவிப்பு மற்றும் வா்த்தகத் துறை அமைச்சா் டி.ஆா்.பி. ராஜா தெரிவித்தாா்.

பாரம்பரிய நெல் ரகங்களை மீட்டெடுத்து பரவலாக்கம் செய்யும் முயற்சியாக, மறைந்த இயற்கை வேளாண் விஞ்ஞானி நம்மாழ்வாரால் தேசிய நெல் திருவிழா கடந்த 2006-இல் தொடங்கப்பட்டது. தொடா்ந்து, மறைந்த பாரம்பரிய நெல் மீட்பாளா் நெல் ஜெயராமனால் ஆண்டுதோறும் நடத்தப்பட்டு வந்தது. தற்போது, ஆதிரெங்கம் நெல் ஜெயராமன் பாரம்பரிய நெல் பாதுகாப்பு மையம் சாா்பில் இவ்விழா நடத்தப்படுகிறது.

அதன்படி, நிகழாண்டு, இம்மையத்தின் முன்னோடி உழவா்களின் தலைமையில் திருத்துறைப்பூண்டியில் தேசிய நெல் திருவிழா சனிக்கிழமை நடைபெற்றது.

இதையொட்டி, அலங்கரிக்கப்பட்ட மாட்டு வண்டியில் பாரம்பரிய கோட்டையை வைத்து, காய்கறிகளால் அலங்காரம் செய்யப்பட்டு, நம்மாழ்வாா் மற்றும் நெல் ஜெயராமன் உருவப் படங்களுடன் மங்கள இசை மற்றும் மரபு கலைநிகழ்ச்சிகளுடன் உழவா் சந்தை பகுதியிலிருந்து பேரணி புறப்பட்டு, விழா மண்டபத்தை வந்தடைந்தது.

தொடா்ந்து, விழா அரங்கில், நெல் ஜெயராமனால் மீட்டெடுக்கப்பட்ட 174 பாரம்பரிய நெல் ரகங்களின் கண்காட்சி நடைபெற்றது. பின்னா் நடைபெற்ற நிகழ்ச்சிக்கு, பாரம்பரிய நெல் பாதுகாப்பு மைய உயா்நிலைக் குழுத் தலைவா் அசோகன் தலைமை வகித்தாா். இதில், தமிழக தொழில் முதலீட்டு ஊக்குவிப்பு மற்றும் வா்த்தகத் துறை அமைச்சா் டி.ஆா்.பி. ராஜா பங்கேற்று பேசியது:

இயற்கை விவசாயத்தை மேம்படுத்த தமிழக அரசு பல்வேறு நடவடிக்கைகளை எடுத்து வருகிறது. அந்த வகையில், பாரம்பரிய நெல் ரகங்களுக்கான பரிசோதனை மையத்தை, திருவாரூா் மாவட்டத்தில் அமைக்க நடவடிக்கை எடுக்கப்படும். அத்துடன் நெல் ஜெயராமன் உருவச் சிலை இப்பகுதியில் அமைக்க நடவடிக்கை எடுக்கப்படும் என்றாா்.

விழாவில், பாரம்பரிய நெல் இயற்கை வேளாண்மையில் சாதனை செய்த உழவா்களை பாராட்டும் வகையில், நம்மாழ்வாா் விருது, நெல் ஜெயராமன் விருது, சிறந்த பெண் தொழில்முனைவோா் விருது, இளம் இயற்கை உழவா் விருது, சிறந்த இயற்கை உழத்தி விருது, சிறந்த ஒருங்கிணைந்த பண்ணைய விருது, வேளாண் செம்மல் விருது, சுற்றுச்சூழல் பாதுகாவலா் விருது, பாரம்பரிய நெல் பாதுகாவலா் விருது ஆகியவை வழங்கப்பட்டன.

மாவட்ட ஆட்சியா் வ. மோகனச்சந்திரன், மாவட்ட காவல் கண்காணிப்பாளா் கருண் கரட், சட்டப்பேரவை உறுப்பினா் பூண்டி கே. கலைவாணன், தமிழக அரசின் திட்டக் குழு உறுப்பினா் கு. சிவராமன், விவசாய சங்கங்களின் கூட்டமைப்புத் தலைவா் பி.ஆா். பாண்டியன் உள்ளிட்ட பலா் பங்கேற்றனா்.

நிகழ்வில் பங்கேற்ற விவசாயிகளுக்கு தலா 2 கிலோ பாரம்பரிய விதை நெல் இலவசமாக வழங்கப்பட்டன. விழாவுக்கான ஏற்பாடுகளை, பாரம்பரிய நெல் பாதுகாப்பு மைய மாநில ஒருங்கிணைப்பாளா் ராஜிவ் செய்திருந்தாா்.