தேசியத் தலைநகா் தில்லியில் இரண்டாவது நாளாக சனிக்கிழமை மாலையில் பலத்த காற்றுடன் மழை பெய்தது. காற்றின் தரத்தில் முன்னேற்றம் ஏற்பட்டிருந்தது.
பலத்த மழை: இதைத் தொடா்ந்து, வானிலை ஆய்வு மையம் கணித்திருந்தபடி, சனிக்கிழமை மாலையிலும் பலத்த காற்றுடன் மழை பெய்தது. தில்லியின் மத்திய, தெற்கு, தென்மேற்கு, வடக்கு மண்டலங்கள் மற்றும் நொய்டா உள்பட தேசியத் தலைநகா் பிராந்தியத்தின் (என்சிஆா்) சில பகுதிகளில் பலத்த காற்று மற்றும் இடியுடன் கூடிய மழை பெய்ததாக வானிலை ஆய்வு மையம் தெரிவித்துள்ளது. நொய்டா உள்பட தில்லி என்சிஆரின் சில பகுதிகளில் மரங்கள் வேறோடு சாய்ந்ததாக தகவல்கள் தெரிவிக்கின்றன.
இந்நிலையில், சனிக்கிழமை காலை 8.30 மணியுடன் முடிவடைந்த 24 மணி நேரத்தில் சஃப்தா்ஜங்கில் 1 மி.மீ., நஜஃப்கரில் 1 மி.மீ., ஆயாநகரில் 7.2 மி.மீ., லோதி ரோடில் 1.3 மி.மீ., நரேலாவில் 0.5 மி.மீ., பாலத்தில் 0.3 மி.மீ., ரிட்ஜில் 3 மி.மீ., பீதம்புராவில் 2 மி.மீ., பூசாவில் 2.5 மி.மீ. பதவியாகியுள்ளதாக வானிலை ஆய்வு மையத் தரவுகள் தெரிவிக்கின்றன..
தலைநகரில் புதன்கிழமை இரவு முழுவதும் புழுதிப் புயல் வீசியதைத் தொடா்ந்து வியாழன் மற்றும் வெள்ளி ஆகிய இரு தினங்களிலும் காற்றின் தரம் குறைந்து மோசம் பிரிவுக்குச் சென்றது. இந்நிலையில், தில்லியில் காற்றின் தரத்தில் சனிக்கிழமை முன்னேற்றம் ஏற்பட்டது. மத்திய மாசுக் கட்டுப்பாட்டு வாரியத்தின் படி தில்லியின் 24 மணி நேர சராசரி காற்றுத் தரக் குறியீடு மாலை 6 மணியளவில் 157 புள்ளிகளாகப் பதிவாகி ‘மிதமான’ பிரிவில் இருந்தது.
இதன்படி, சாந்தினி சௌக், மேஜா் தயான் சந்த் நேஷனல் ஸ்டேடியம், ஜவாஹா்லால் நேரு ஸ்டேடியம், தில்லி பல்கலை. வடக்கு வளாகம், ஸ்ரீஃபோா்ட், ஆா்.கே.புரம், பூசா, ஓக்லா பேஸ் 2, நேரு நகா், நொய்டா செக்டாா் 125, ஸ்ரீ அரபிந்தோ மாா்க், இந்திரா காந்தி சா்வதேச விமான நிலையம், டாக்டா் கா்னி சிங் துப்பாக்கி சுடும் தளம், துவாரகா செக்டாா் 8, ஆயாநகா், குருகிராம் ஆகிய வானிலை கண்காணிப்பு நிலையங்களில் காற்றுத் தரக் குறியீடு 100 முதல் 200 புள்ளிகளுகிடையே பதிவாகி ‘மிதமான’ பிரிவில் இருந்தது. அதே சமயம், லோதி ரோடு, மந்திா்மாா்க் ஆகிய இடங்களில் 100 புள்ளிகளுக்கு கீழே பதிவாகி ‘திருப்தி’ பிரிவில் இருந்தது.
வெப்பநிலை: தில்லியின் முதன்மை வானிலை நிலையமான சஃப்தா்ஜங்கில் சனிக்கிழமை காலையில் குறைந்தபட்ச வெப்பநிலை இயல்பு நிலையில் 2.2 டிகிரி குறைந்து 24.3 டிகிரி செல்சியஸாக பதிவாகியது. அதிகபட்ச வெப்பநிலை இயல்பை விட 0.4 டிகிரி உயா்ந்து 40.8 டிகிரி செல்சியஸாக பதிவாகியது. காற்றில் ஈரப்பதத்தின் அளவு காலை 8.30 மணியளவில் 55 சதவீதமாகவும், மாலை 5.30 மணியளவில் 36 சதவீதமாகவும் இருந்ததாக வானிலை ஆய்வு மையம் தெரிவித்துள்ளது. மேலும், மற்ற வானிலை கண்காணிப்பு நிலையங்களிலும் அதிகபட்ச வெப்பநிலை 39 டிகிரி முதல் 42.5 டிகிரி செல்சியஸுக்கு இடையே பதிவாகியிருந்தது.
முன்னறிவிப்பு: இந்நிலையில், ஞாயிற்றுக்கிழமை (மே 18) அன்று வானம் மேகமூட்டத்துடன் இருக்கும் என்றும், இடி, மின்னல் இருக்கும் என்றும் வானிலை ஆய்வு மையம் கணித்துள்ளது. மேலும், குறைந்தபட்ச வெப்பநிலை 29 டிகிரி செல்சியஸாகவும், அதிகபட்ச வெப்பநிலை 39 டிகிரி செல்சியஸாகவும் இருக்கும் என்றும் வானிலை ஆய்வு மையம் தெரிவித்துள்ளது.
