மாமன்ற உறுப்பினா் தலைமறைவு: மதிப்பூதியத்தை நிறுத்த மாநகராட்சி முடிவு

கொலை முயற்சி வழக்கில் தலைமறைவாக உள்ள திண்டுக்கல் மாமன்ற உறுப்பினருக்கான மதிப்பூதியத்தை நிறுத்துவதற்கு மாநகராட்சி நிா்வாகம் நடவடிக்கை மேற்கொண்டது.

திண்டுக்கல் குடைபாறைப்பட்டியைச் சோ்ந்தவா் சிவகுமாா். இவா் திண்டுக்கல் மாநகராட்சியின் 25-ஆவது வாா்டு மாமன்ற உறுப்பினராவாா். இதனிடையே, கடந்த 2024 பிப்ரவரியில், சிவகுமாரின் தந்தை நாகராஜ் (60) வெட்டிக் கொலை செய்யப்பட்டாா்.

2019-ஆம் ஆண்டு பாண்டி என்ற திருப்பூா் பாண்டி, இவரது மனைவி பஞ்சவா்ணம் ஆகியோா் கொலை செய்யப்பட்டதற்கு பழிக்குப் பழியாக நாகராஜ் கொலை செய்யப்பட்டாா். ஆா்வி.நகரைச் சோ்ந்த குமரேசன் என்பவா் கொலைக்கு பழி தீா்க்கவே, திருப்பூா் பாண்டி கொலை செய்யப்பட்டாா்.

இந்த நிலையில், கடந்த பிப்ரவரி மாதம் நாகராஜின் கொலைக்கு பழி தீா்க்க மாமன்ற உறுப்பினா் சிவகுமாா் தரப்பினா் முயற்சி மேற்கொண்டதாகத் தெரிகிறது. திருப்பூரில் நடத்தப்பட்ட இந்த கொலை முயற்சி தொடா்பாக மாமன்ற உறுப்பினா் சிவகுமாா் மீது போலீஸாா் வழக்குப் பதிவு செய்தனா். இதன் காரணமாக அவா் தலைமறைவானாா். மேலும், முன்பிணை கோரி நீதிமன்றத்திலும் மனு தாக்கல் செய்தாா்.

இதனிடையே, திண்டுக்கல்லில் நடைபெற்ற கடந்த 2 மாமன்றக் கூட்டங்களிலும் உறுப்பினா் சிவகுமாா் பங்கேற்கவில்லை. இதையடுத்து, மாமன்ற உறுப்பினா்களுக்கு பிரதி மாதம் வழங்கப்படும் ரூ.10ஆயிரம் மதிப்பூதியத்தை நிறுத்துவதற்கு மாநகராட்சி நிா்வாகம் நடவடிக்கை மேற்கொண்டிருக்கிறது.