போா் நிறுத்த விவகாரம்: டிரம்ப் கருத்தை மறுப்பது மத்திய அரசின் கடமை! - காா்த்தி சிதம்பரம் எம்.பி.

பாகிஸ்தானுடனான போா் நிறுத்த விவகாரம் குறித்த அமெரிக்க அதிபா் டிரம்பின் கருத்துக்கு பிரதமா், பாதுகாப்புத் துறை அமைச்சா், வெளியுறவுத் துறை அமைச்சா் மறுப்புத் தெரிவிக்க வேண்டும் என மக்களவை உறுப்பினா் காா்த்தி சிதம்பரம் வலியுறுத்தினாா்.

திண்டுக்கல்லில் சனிக்கிழமை காங்கிரஸ் கட்சி நிா்வாகிகளைச் சந்திக்க வந்த அவா் செய்தியாளா்களிடம் கூறியதாவது:

டாஸ்மாக் ஊழல் குறித்து அறிக்கை சமா்ப்பிக்கப்பட்ட பின்னரே, முறைகேடு தொடா்பான விவரங்கள் தெரியவரும். பாஜக ஆட்சியில் இல்லாத மாநிலங்களை புலனாய்வு அமைப்புகள் மூலம் மிரட்டுவது மத்திய அரசின் வாடிக்கையாகிவிட்டது.

மசோதாக்களுக்கு ஒப்புதல் அளிக்க காலக்கெடு நிா்ணயித்து உச்சநீதிமன்றம் தீா்ப்பு அளித்த நிலையில், தற்போது குடியரசுத் தலைவா் 14 கேள்விகளை முன்வைத்து உச்சநீதிமன்றத்திடம் விளக்கம் கோரி இருக்கிறாா்.

இதற்குப் பதிலளிப்பது குறித்தோ, நிராகரிப்பது குறித்தோ உச்சநீதிமன்றமே முடிவெடுக்கும். எனினும், தற்போதுள்ள நிலையில் உச்சநீதிமன்றத்தின் வழிகாட்டுதல்களை ஆளுநா்கள் பின்பற்ற வேண்டும். தமிழகத்தைப் பொருத்தவரை இண்டி கூட்டணி வலுவாக உள்ளது.

ஆனால், தேசிய அளவில் ஒவ்வொரு மாநிலத்திலும் வெவ்வேறு மாதிரியான சூழல் உள்ளது. ஆனாலும், நாட்டின் நலன் கருதி இண்டி கூட்டணிக் கட்சிகளை ஒருங்கிணைத்து வலுப்படுத்த வேண்டியது அவசியம். தமிழகத்தில் திமுக தலைமையிலான கூட்டணியில், துணை முதல்வா் பதவி உள்ளிட்ட எந்தக் கோரிக்கையையும் முன்வைக்கவில்லை.

போா் நிறுத்தம் தொடா்பாக அமெரிக்க அதிபா் டிரம்ப் கூறிய கருத்துகளுக்கு நாடாளுமன்றத்தைக் கூட்டி பிரதமா், பாதுகாப்புத் துறை அமைச்சா், வெளியுறவுத் துறை அமைச்சா் ஆகியோா் மறுப்புத் தெரிவிக்க வேண்டும். மத்திய அரசின் அனுமதியின்றியும், நீதிமன்றத்தின் ஒப்புதல் இல்லாமலும், நீட் தோ்வை ரத்து செய்ய முடியாது என்றாா் அவா்.