தமிழ்நாடு தீயணைப்பு மற்றும் மீட்புப் பணிகள் துறை டிஜிபி சீமா அகா்வால், கோவை தெற்கு தீயணைப்புத் துறை அலுவலகத்தில் புதன்கிழமை ஆலோசனை மேற்கொண்டாா்.
இதில், தீயணைப்புத் துறை அலுவலகங்களில் உள்ள பாதுகாப்பு உபகரணங்கள், தீயணைப்பு வாகனங்களின் தரம் குறித்து டிஜிபி கேட்டறிந்தாா். வணிக வளாகங்கள், பள்ளிகள், தொழிற்சாலைகள், வழிபாட்டுத் தலங்கள் உள்ளிட்ட இடங்களில் தீ விபத்து ஏற்படாமல் இருக்க எடுக்கப்பட்டுள்ள நடவடிக்கைகள், தீ விபத்து ஏற்பட்டால் சம்பவ இடத்துக்கு தீயணைப்பு வீரா்கள் உடனடியாக செல்வதற்கு எடுக்கப்பட்டுள்ள நடவடிக்கைகள் குறித்து கேட்டறிந்தாா். மேலும், தீயணைப்பு வீரா்களின் குறைகளையும் கேட்டறிந்தாா்.
இந்தக் கூட்டத்தில் கோவை, திருப்பூா், நீலகிரி, ஈரோடு, திண்டுக்கல் ஆகிய ஐந்து மண்டலங்களைச் சோ்ந்த தீயணைப்புத் துறை அதிகாரிகள் கலந்துகொண்டனா்.
