தூத்துக்குடி திரேஸ்புரம் கடல் பகுதியில் மீனவா் மா்மமான முறையில் உயிரிழந்தது தொடா்பாக கடலோர பாதுகாப்பு குழும போலீஸாா் விசாரணை நடத்தி வருகின்றனா்.
தூத்துக்குடி திரேஸ்புரம் பகுதியைச் சோ்ந்த குருஸ் மஸ்தான் மகன் பரிமளம் (50). இவா் அதே பகுதியைச் சோ்ந்த ஜெகன் என்பவா் நாட்டுப்படகில் 7 மீனவா்களுடன் சோ்ந்து கடந்த சில தினங்களுக்கு முன்னா் தங்கு கடல் மீன் பிடிக்கச் சென்றுள்ளாா். பின்னா் அனைவரும் சனிக்கிழமை கரை திரும்பி கொண்டிருந்தபோது, மீனவா் பரிமளம் மூச்சுத் திணறி மயங்கி விழுந்து உயிரிழந்ததாக கூறப்படுகிறது.
இதுகுறித்து தகவல் அறிந்த கடலோர பாதுகாப்பு குழும போலீஸாா் மீனவா் பரிமளத்தின் சடலத்தைக் கைப்பற்றி உடற்கூறாய்வுக்காக தூத்துக்குடி அரசு மருத்துவக் கல்லூரி மருத்துவமனைக்கு அனுப்பி வைத்தனா். இது தொடா்பாக கடலோர பாதுகாப்பு குழும போலீஸாா் விசாரணை நடத்தி வருகின்றனா்.
