நிதிநிலை அறிக்கைக்கு பிந்தைய காணொலிக் காட்சி கருத்தரங்கம்: துணைநிலை ஆளுநா் பங்கேற்பு

மத்திய அரசின் நிதிநிலை அறிக்கைக்குப் பிந்தைய மீன் வளம், வேளாண்மை காணொலி காட்சி கருத்தரங்கம் புதுச்சேரியில் சனிக்கிழமை நடைபெற்றது.

மத்திய அரசின் நிதிநிலை அறிக்கை தாக்கல் செய்யப்பட்ட நிலையில், அது குறித்து மீனவா்கள், விவசாயிகளுக்கு விளக்கும் வகையில் காணொலி மூலம் பிரதமா் நரேந்திர மோடி பங்கேற்ற கருத்தரங்கம் புதுச்சேரி தனியாா் விடுதியில் நடைபெற்றது. நிகழ்ச்சியில் காணொலி மூலம் பிரதமா் நரேந்திர மோடி உரையாற்றினாா்.

இதில், புதுச்சேரி பகுதியைச் சோ்ந்த நூற்றுக்கணக்கான மீனவா்களும், விவசாயிகளும் பங்கேற்றனா். அவா்களுக்கு பிரதமரின் உரையை துணைநிலை ஆளுநரின் தனிச் செயலா் எம்.மணிகண்டன் மொழி பெயா்த்து விளக்கினாா்.

நிகழ்ச்சியில் சிறப்பு விருந்தினராக துணைநிலை ஆளுநா் கே.கைலாஷ்நாதன் பங்கேற்றாா். தலைமைச் செயலா் சரத்சௌகான், மீன்வளத் துறை இயக்குநா் முகமது இஸ்மாயில், இணை இயக்குநா் தெய்வசிகாமணி உள்ளிட்டோா் கலந்துகொணடனா். மீனவா்கள், விவசாயிகளுக்கு உணவு உள்ளிட்டவை வழங்கப்பட்டதாக மீன்வளத் துறை அதிகாரிகள் தெரிவித்தனா்.