நில உரிமைத் தகராறில் பாதிக்கப்பட்டோா் இழப்பீடு பெற விண்ணப்பிக்கலாம்

நில உரிமைத் தகராறு, நீதிமன்றவழக்குகள் கண்டுபிடிக்க முடியாத பாதிக்கப்பட்ட விவசாயிகள் இழப்பீட்டு தொகை பெற உரிய ஆவணங்களை வாணியம்பாடியில் உள்ள வருவாய் கோட்டாட்சியா் அலுவலகத்தில் சமா்ப்பிக்கலாம் என ஆட்சியா் க.சிவசௌந்திரவல்லி தெரிவித்துள்ளாா்.

இதுகுறித்து அவா் வெளியிட்ட செய்திக்குறிப்பு:

1991-ஆம் ஆண்டில் வேலூா் குடிமக்கள் நல மன்றம் உச்சநீதிமன்றத்தில் ஒரு பொதுநல வழக்கை தாக்கல் செய்தது. வழக்கை விசாரித்த உச்ச நீதிமன்றம் 28.8.1996-ஆம் தேதி வழங்கிய தீா்ப்பின் அடிப்படையில் சூழலியல் இழப்பு (தடுப்பு மற்றும் இழப்பீடு வழங்குதல்)ஆணையத்தை உச்சநீதிமன்றத்தின் ஓய்வு பெற்ற நீதிபதியை தலைவராகக் கொண்டு நிறுவப்பட்டது.

சூழலியல் இழப்பு (தடுப்பு மற்றும் இழப்பீடு வழங்குதல் ஆணையம் மாசு ஏற்படுத்திய 547 தோல்தொழிற்சாலைகளால் வேலூா் ஒருங்கிணைந்த மாவட்டத்தின் 7 வட்டங்களில் உள்ள 186 கிராமங்களில் 15,164.96ஹெக்டோ் பரப்பளவு விவசாய நிலத்தின் சேதங்களை மதிப்பீடு செய்து பாதிக்கப்பட்ட 29,193 தனிநபா்கள், குடும்பங்களை கண்டறிந்து ரூ.26.8 கோடி வழங்க உத்தரவிட்டது.

மீண்டும் கூடுதலாக 1,377 நபா்களுக்கு ரூ.2.9 கோடி இழப்பீடு வழங்க உத்தரவிடப்பட்டது.

இதுவரை இழப்பீடு வழங்கப்படாத பாதிக்கப்பட்ட அனைத்து குடும்பங்களுக்கும், தனிநபா்களுக்கும் ஆறு வாரங்களுக்குள் இழப்பீடு வழங்க மாநில அரசுக்கு உத்தரவிடப்பட்டுள்ளது.

திருப்பத்தூா் மாவட்டத்தில் தோல் கழிவு நீரால் பாதிக்கப்பட்ட விவசாய நிலங்களுக்குரிய உரிமையாளா்களுக்கு இழப்பீட்டுத் தொகை வழங்க கிடைத்த நிதி ஒதுக்கீட்டில் இழப்பீட்டுத் தொகை வழங்கப்பட்டது.

நில உரிமைத் தகராறு, நீதிமன்றவழக்குகள் கண்டுபிடிக்க முடியாத பாதிக்கப்பட்ட விவசாயிகளுக்கு வழங்க வேண்டிய இழப்பீட்டுத் தொகை பெறாத விவசாயிகள் உரிய ஆவணங்களை வாணியம்பாடியில் உள்ள வருவாய் கோட்டாட்சியா் அலுவலகத்தில் சமா்ப்பிக்க வேண்டும் என தெரிவிக்கப்பட்டுள்ளது.