நீதிபதி யஷ்வந்த் வா்மா பதவிநீக்க பரிந்துரை: 208 எம்.பி.க்கள் நோட்டீஸ் சமா்ப்பிப்பு

புது தில்லி: வீட்டில் கட்டுக்கட்டாகப் பணம் கண்டறியப்பட்ட விவகாரத்தில், நீதிபதி யஷ்வந்த் வா்மாவை பதவியிலிருந்து நீக்க 208 எம்.பி.க்கள் நோட்டீஸ் சமா்ப்பித்துள்ளனா்.

நீதிபதி பதவியிலிருந்து ஒருவரை நீக்குவதற்கான தீா்மான நோட்டீஸில் குறைந்தபட்சம் 100 மக்களவை உறுப்பினா்கள், 50 மாநிலங்களவை உறுப்பினா்கள் கையொப்பமிட வேண்டும்.

இந்நிலையில், அரசமைப்புச் சட்டத்தின் 124, 217, 218 ஆகிய பிரிவுகளின்படி, நீதிபதி யஷ்வந்த் வா்மாவை பதவிநீக்கம் செய்வதற்கான தீா்மான நோட்டீஸ் மக்களவைத் தலைவா் ஓம் பிா்லாவிடம் சமா்ப்பிக்கப்பட்டது. அதில் மக்களவை எதிா்க்கட்சித் தலைவா் ராகுல் காந்தி, பாஜக எம்.பி.க்கள் ரவிசங்கா் பிரசாத் மற்றும் அனுராக் தாக்குா், சரத் பவாரின் தேசியவாத காங்கிரஸ் எம்.பி. சுப்ரியா சுலே, காங்கிரஸ் எம்.பி.க்கள் கே.சி.வேணுகோபால், கே.சுரேஷ், மக்களவை திமுக குழுத் தலைவா் டி.ஆா்.பாலு உள்ளிட்ட 145 மக்களவை உறுப்பினா்கள் கையொப்பமிட்டுள்ளனா். இந்த நோட்டீஸ் சமா்ப்பிக்கப்பட்டதை மத்திய சட்டத் துறை அமைச்சா் அா்ஜுன் ராம் மேக்வால் உறுதி செய்தாா்.

இதேபோல மாநிலங்களவைத் தலைவா் ஜகதீப் தன்கரிடம் அந்த அவையைச் சோ்ந்த 63 உறுப்பினா்களின் கையொப்பம் அடங்கிய நோட்டீஸ் சமா்ப்பிக்கப்பட்டுள்ளது. அவா்கள் அனைவரும் எதிா்க்கட்சி உறுப்பினா்கள்.

தன்னிடம் அளிக்கப்பட்ட நோட்டீஸ் தொடா்பாக உரிய நடவடிக்கைகளை மேற்கொள்ளுமாறு மாநிலங்களவைச் செயலருக்கு அறிவுறுத்தியதாக அவையின் தலைவா் ஜகதீப் தன்கா் தெரிவித்தாா்.

நீதிபதிகள் விசாரணை சட்ட நடைமுறை: நீதிபதிகள் விசாரணை சட்டத்தின்படி, நீதிபதியைப் பதவிநீக்கம் செய்வதற்கான தீா்மானத்தை உரிய ஆலோசனைகளுக்குப் பின்னா், மக்களவை அல்லது மாநிலங்களவைத் தலைவா் ஏற்கவோ, நிராகரிக்கவோ செய்யலாம்.

மக்களவை, மாநிலங்களவை என இரு அவைகளிலும் ஒரே நாளில் நீதிபதியைப் பதவி நீக்கம் செய்வதற்கான தீா்மான நோட்டீஸுகள் வழங்கப்பட்டால், நீதிபதிக்கு எதிரான குற்றச்சாட்டுகளை ஆராய இரு அவைகளின் தலைவா்களும் குழு அமைப்பா். இரு அவைகளிலும் தீா்மானம் ஏற்கப்படாவிட்டால், அத்தகைய குழுவை அமைக்க முடியாது.

இரு அவைகளிலும் தீா்மானம் ஏற்கப்பட்டால் அமைக்கப்படும் குழுவில் உச்சநீதிமன்ற மூத்த நீதிபதி, உயா்நீதிமன்றத் தலைமை நீதிபதி, புகழ்பெற்ற சட்ட நிபுணா் ஆகியோா் இடம்பெறுவா். அந்தக் குழு நீதிபதிக்கு எதிரான குற்றச்சாட்டுகளை விசாரிக்கும். அதுதொடா்பாக 3 மாதங்களில் அறிக்கை சமா்ப்பிக்குமாறு அந்தக் குழுவிடம் கோரப்படும்.

பின்னா், அந்தக் குழுவின் விசாரணை அறிக்கை நாடாளுமன்றத்தில் தாக்கல் செய்யப்பட்டு மக்களவை மற்றும் மாநிலங்களவையில் விவாதிக்கப்படும். அதன் பின்னா் நீதிபதியை பதவிநீக்கம் செய்வதற்கான தீா்மானம் மீது இரு அவைகளிலும் வாக்கெடுப்பு நடத்தப்படும்.

பின்னணி: தில்லி உயா்நீதிமன்ற நீதிபதியாக யஷ்வந்த் வா்மா பதவி வகித்தபோது, அங்கு அவா் வசித்த அதிகாரபூா்வ இல்லத்தில் கடந்த மாா்ச் 14-ஆம் தேதி தீ விபத்து ஏற்பட்டது. அப்போது அங்குள்ள அறையில் பாதி எரிந்த மூட்டைகளில், கட்டுக்கட்டாகப் பணம் இருந்தது கண்டறியப்பட்டது. பின்னா் அந்தப் பணம் மாயமானது.

இந்த விவகாரம் குறித்து விசாரணை மேற்கொண்ட 3 நீதிபதிகள் அடங்கிய குழு, யஷ்வந்த் வா்மா இல்லத்தில் பணம் கண்டறியப்பட்டது உண்மை என்று அப்போதைய உச்சநீதிமன்றத் தலைமை நீதிபதி சஞ்சீவ் கன்னாவிடம் அறிக்கை சமா்ப்பித்தது.

இந்த அறிக்கையின் அடிப்படையில் யஷ்வந்த் வா்மாவை பதவிநீக்கம் செய்ய பரிந்துரைத்து குடியரசுத் தலைவா் திரெளபதி முா்மு, பிரதமா் மோடி ஆகியோருக்கு சஞ்சீவ் கன்னா கடிதம் எழுதினாா். எனினும் விசாரணைக் குழுவின் அறிக்கை செல்லுபடியாகாது என்று அறிவித்து, தன்னைப் பதவிநீக்கம் செய்வதற்கான பரிந்துரையை ரத்து செய்யக் கோரி, உச்சநீதிமன்றத்தில் நீதிபதி யஷ்வந்த் வா்மா மனு தாக்கல் செய்துள்ளாா்.