நீதிபதிகள் நியமனத்தில் மத்திய அரசின் தாமதத்துக்கு எதிரான மனுக்கள்: விசாரிக்க உச்சநீதிமன்றம் ஒப்புதல்

நீதிபதிகள் நியமனத்துக்கான பெயா்களை உச்சநீதிமன்ற கொலீஜியம் மீண்டும் அனுப்பிய பிறகும், அதற்கு ஒப்புதல் அளிப்பதில் மத்திய அரசு தொடா்ந்து தாமதித்து வருவதை கேள்வி எழுப்பி தாக்கல் செய்யப்பட்ட மனுக்களை விசாரணைக்கு ஏற்க உச்சநீதிமன்றம் வியாழக்கிழமை ஒப்புக்கொண்டது.

உச்சநீதிமன்ற, உயா்நீதிமன்ற நீதிபதிகள் நியமனம் என்பது உச்சநீதிமன்ற தலைமை நீதிபதி தலைமையிலான கொலீஜியம் பரிந்துரையின் அடிப்படையில் மேற்கொள்ளப்பட்டு வருகிறது. கொலீஜியம் பரிந்துரைக்கும் நபா்களை நீதிபதிகளாக மத்திய அரசு நியமனம் செய்து வருகிறது. இந்த நடைமுறையை மாற்ற மத்திய அரசு முயற்சித்தது. ஆனால், கொலீஜியம் நடைமுறையை சரியானது. அந்த நடைமுறையே தொடரும் என உச்சநீதிமன்றம் திட்டவிட்டமாக தெரிவித்தது. இதன் காரணமாக, இந்த விஷயத்தில் மத்திய அரசுக்கும் - உச்சநீதிமன்றத்துக்கும் இடையே அவ்வப்போது மோதல் போக்கு இருந்து வருகிறது. இதன் காரணமாக, நீதிபதிகள் நியமனம் தொடா்பான கொலீஜியம் பரிந்துரைகளுக்கு ஒப்புதல் அளிப்பதில் மத்திய அரசு அவ்வப்போது தாமதம் செய்து வருகிறது. இதை உச்சநீதிமன்றமும் பல முறை சுட்டிக்காட்டியுள்ளது.

மத்திய அரசின் இந்த தாமதத்துக்கு எதிராக உச்சநீதிமன்றத்தில் மனுக்கள் தாக்கல் செய்யப்பட்டு, நிலுவையில் இருந்துவந்தன.

இந்த நிலையில், நீதிபதிகள் நியமனத்துக்கான பெயா்களை உச்சநீதிமன்ற கொலீஜியம் மீண்டும் அனுப்பிய பிறகும், அதற்கு ஒப்புதல் அளிப்பதில் மத்திய அரசு தொடா்ந்து தாமதித்து வருவதை கேள்வி எழுப்பி உச்சநீதிமன்றத்தில் புதிதாக மனுக்கள் தாக்கல் செய்யப்பட்டன.

இந்த மனுக்கள் உச்சநீதிமன்ற தலைமை நீதிபதி பி.ஆா். கவாய், நீதிபதி கே. வினோத் சந்திரன் ஆகியோா் அடங்கிய அமா்வில் வியாழக்கிழமை பரிசீலனைக்கு வந்தது.

அப்போது, மனுதாரா் தரப்பில் ஆஜரான மூத்த வழக்குரைஞா் அரவிந்த் தத்தாா், ‘நீதிபதி நியனமத்துக்கு சிலரின் பெயா்களை முதலில் 2019-ஆம் ஆண்டிலும், பின்னா் 2020 மற்றும் 2022-ஆம் ஆண்டிலும் மத்திய அரசின் ஒப்புதலுக்காக உச்சநீதிமன்ற கொலீஜியம் மீண்டும் அனுப்பியது. ஆனால், இதுவரை அந்தப் பரிந்துரைகளுக்கு மத்திய அரசு ஒப்புதல் அளிக்கவில்லை. முடிவுகளை எடுக்க ஒவ்வொரு நிலையிலும் கால நிா்ணயத்தை உச்சநீதிமன்றம் செய்து வருகிறது. அந்த வகையில், மத்திய அரசு ஒப்புதல் அளிக்க சில வாரங்கள் தாமதம் என்பது ஏற்றுக்கொள்ளக்கூடியது. ஆனால், பல ஆண்டுகளாக தாமதிப்பதை புரிந்துகொள்ள முடியவில்லை. இதனால் நீதிபதி பதவிக்கு பரிந்துரைக்கப்பட்ட வழக்குரைஞா்கள் ஆா்வத்தையும், பணி மூப்பையும் இழந்து வருகின்றனா்’ என்றாா்.

மற்றொரு மனுதாரா் தரப்பில் ஆஜரான மூத்த வழக்குரைஞா் பிரசாந்த் பூஷண், நீதிபதி பதவிக்கு தில்லி பெண் வழக்குரை நியமனம் செய்ய உச்சநீதிமன்ற கொலீஜியம் அனுப்பிய பரிந்துரைக்கு மத்திய அரசு ஒப்புதல் அளிக்காததை சுட்டிக்காட்டி, ‘அந்தப் பெண் வழக்குரைஞா் தேசிய சட்டக் கல்லூரியில் சட்டப் படிப்பில் முதல் மாணவியாக தோ்ச்சி பெற்றவா்’ என்று குறிப்பிட்டாா். கொலீஜியம் பரிந்துரைகளுக்கு ஒப்புதல் அளிக்க மத்திய அரசு தாமதிப்பது தொடா்ச்சியான நிகழ்வாகி வருகிறது என்றும் அவா் கூறினாா்.

மேலும், ‘ஒப்புதல் அளிக்க மத்திய அரசு தாமதம் செய்வதற்கு எதிராக தாக்கல் செய்யப்பட்டு, உச்சநீதிமன்றத்தால் கடந்த 2023-இல் விசாரணைக்குப் பட்டியலிட்டப்பட்ட மனுக்கள், திடீரென விசாரணை பட்டியலிலிருந்து நீக்கப்பட்டுள்ளன’ என்றும் சுட்டிக்காட்டிய வழக்குரைஞா்கள், தற்போது தாக்கல் செய்யப்பட்ட மனுக்களை அவசர வழக்காக விசாரிக்க வேண்டும் என்று கோரினா்.

இதைக் கேட்ட தலைமை நீதிபதி, ‘இந்த மனுக்கள் இரண்டு வாரங்களுக்குப் பிறகு விசாரிக்கப்படும்’ என்றாா்.