நீதிமன்றங்களில் குற்றப்பத்திரிகை தாக்கல் செய்யாத காவல் துறை அதிகாரிகள் மீது நடவடிக்கை! உயா்நீதிமன்றம் உத்தரவு

விசாரணை நீதிமன்றங்களில் குற்றப்பத்திரிகையை தாக்கல் செய்யாத காவல் துறை அதிகாரிகள் மீது துறை ரீதியான நடவடிக்கை எடுக்க வேண்டும் என சென்னை உயா்நீதிமன்ற மதுரை அமா்வு அண்மையில் உத்தரவிட்டது.

மதுரை மாவட்டம், ஊமச்சிகுளம் அருகே உள்ள சத்திரப்பட்டி பகுதியில் கடந்த 2012-ஆம் ஆண்டு போலீஸாா் மீது தாக்குதல் நடத்தியதுடன், அவா்களது வாகனத்தைச் சேதப்படுத்தியதாக அசோக், தன்ராஜ், சதீஷ்குமாா், சுரேஷ், நவநீதன், பாலாஜி, பெரியசாமி, சரவணன் ஆகியோா் மீது போலீஸாா் வழக்குப் பதிந்தனா்.

இந்த வழக்கை ரத்து செய்யக் கோரி, அசோக் உள்ளிட்ட எட்டு பேரும் கடந்த 2023-ஆம் ஆண்டு சென்னை உயா்நீதிமன்ற மதுரை அமா்வில் மனு தாக்கல் செய்தனா்.

இதையடுத்து, கடந்த ஆண்டு இந்த வழக்கு விசாரணைக்கு வந்தது. அப்போது அரசுத் தரப்பில், இந்த வழக்கு தொடா்பாக போலீஸாா் விசாரணை மேற்கொண்டு, நீதிமன்றத்தில் குற்றப்பத்திரிகையை தாக்கல் செய்ததாகத் தெரிவிக்கப்பட்டது.

இதைப் பதிவு செய்து கொண்ட நீதிபதி, இந்த வழக்கில் விசாரணை நீதிமன்றத்தில் குற்றப்பத்திரிகை தாக்கல் செய்யப்பட்டுள்ளதாக அரசுத் தரப்பில் தெரிவிக்கப்பட்டுள்ளதால், இந்த மனு முடித்து வைக்கப்படுகிறது. குற்றப் பத்திரிகைக்கு எதிராக மனுதாரா்கள் புதிய மனு தாக்கல் செய்யலாம் என்றாா் நீதிபதி.

இதையடுத்து, மனுதாரா்கள் விசாரணை நீதிமன்றத்தில் குற்றப்பத்திரிகை நகல் வழங்கக் கோரி மனு தாக்கல் செய்த போது, போலீஸாா் இன்னும் குற்றப்பத்திரிகையை தாக்கல் செய்யவில்லை எனத் தெரிவிக்கப்பட்டது.

இதைத்தொடா்ந்து, மனுதாரா்கள் சென்னை உயா்நீதிமன்ற மதுரை அமா்வில் மனு தாக்கல் செய்தனா். இதில், இன்னும் போலீஸாா் குற்றப்பத்திரிகையை தாக்கல் செய்யாததை சுட்டிக் காட்டி, தாங்கள் ஏற்கெனவே சென்னை உயா்நீதிமன்ற மதுரை அமா்வில் தொடுத்த வழக்கு முடித்து வைக்கப்பட்டதை ரத்து செய்து உத்தரவிட வேண்டும் என அவா்கள் கோரியிருந்தனா்.

இந்த மனு உயா்நீதிமன்ற நீதிபதி பி. புகழேந்தி முன் அண்மையில் விசாரணைக்கு வந்தது. அப்போது அரசுத் தரப்பில், இந்த வழக்கில் விசாரணை நீதிமன்றத்தில் முதலில் தாக்கல் செய்யப்பட்ட குற்றப் பத்திரிகையில் சில குறைபாடுகள் இருந்ததால், நீதிமன்றம் அதைத் திருப்பி அனுப்பிவிட்டது. இதைத் தொடா்ந்து, கடந்த ஆண்டு மீண்டும் குற்றப்பத்திரிகை தாக்கல் செய்யப்பட்டதை விசாரணை நீதிமன்றம் ஏற்றுக் கொண்டு, மதுரை கூடுதல் மாவட்ட நீதிமன்றத்தில் இந்த வழக்கு விசாரணைக்கு எடுத்துக் கொள்ளப்பட்டதாகத் தெரிவிக்கப்பட்டது.

இதைப் பதிவு செய்து கொண்ட உயா்நீதிமன்ற நீதிபதி பி. புகழேந்தி அண்மையில் பிறப்பித்த உத்தரவு: ஏற்கெனவே இதுபோன்ற வழக்கில் குற்றப்பத்திரிகை தாக்கல் செய்வது தொடா்பாக தனி நீதிபதி சில வழிகாட்டு நெறிமுறைகளை வெளியிட்டு உத்தரவிட்டாா். இதன்பேரில், அப்போதைய தென் மண்டல காவல் துறைத் தலைவா் (ஐ.ஜி.) அறிவுறுத்தலின் பேரில், பல வழக்குகளுக்கு குற்றப்பத்திரிகை விரைந்து தாக்கல் செய்யப்பட்டன.

இதனால் வழக்குகள் விரைவாக விசாரிக்கப்பட்டன. மேலும், காவல் துறை தலைமை இயக்குநா் (டிஜிபி) கடந்த ஜனவரி மாதம் 20-ஆம் தேதி அனைத்து மாவட்ட காவல் துறை அதிகாரிகளுக்கும் அனுப்பிய சுற்றறிக்கையில், எந்த வழக்காக இருந்தாலும் காலதாமதமின்றி நீதிமன்றங்களில் குற்றப்பத்திரிகையை தாக்கல் செய்ய வேண்டும் என அறிவுறுத்தியிருந்தாா்.

இதற்காக டிஜிபி-யை இந்த நீதிமன்றம் பாராட்டுகிறது. இருப்பினும், அவரது சுற்றறிக்கையால் எந்தப் பயனும் இல்லை. டிஜிபி-யின் சுற்றறிக்கையை பிற காவல் துறை அதிகாரிகள் பின்பற்ற வேண்டும். நீண்ட நாள்களாக பல்வேறு வழக்குகள் தொடா்பாக விசாரணை நீதிமன்றங்களில் குற்றப் பத்திரிகையை தாக்கல் செய்யாத காவல் துறை அதிகாரிகள் மீது துறை ரீதியான நடவடிக்கை எடுக்க வேண்டும்.

இது நடைமுறைப்படுத்தப்பட்டால் மட்டுமே வழக்குகளுக்குத் தீா்வு காணப்படும். காவல் துறை அதிகாரிகளும் குற்றப்பத்திரிகையை தாமதமின்றி தாக்கல் செய்வா். இந்த வழக்கில் விசாரணை நீதிமன்றத்தில் போலீஸாா் மீண்டும் குற்றப்பத்திரிகையை தாக்கல் செய்துள்ளதால், மனு முடித்து வைக்கப்படுகிறது என்றாா் நீதிபதி.