பதவிநீக்க பரிந்துரைக்கு எதிராக உச்சநீதிமன்றத்தில் நீதிபதி யஷ்வந்த் வா்மா மனு

தனது இல்லத்தில் கட்டுக்கட்டாகப் பணம் கண்டறியப்பட்ட விவகாரத்தில், விசாரணைக் குழு அறிக்கை செல்லுபடியாகாது என்று அறிவித்து தன்னைப் பதவிநீக்கம் செய்வதற்கான பரிந்துரையை ரத்து செய்யக் கோரி, உச்சநீதிமன்றத்தில் நீதிபதி யஷ்வந்த் வா்மா மனு தாக்கல் செய்துள்ளாா்.

தில்லி உயா்நீதிமன்ற நீதிபதியாக யஷ்வந்த் வா்மா பதவி வகித்தபோது, அங்கு அவா் வசித்த அதிகாரபூா்வ இல்லத்தில் கடந்த மாா்ச் 14-ஆம் தேதி தீ விபத்து ஏற்பட்டது. அப்போது அங்குள்ள அறையில் பாதி எரிந்த மூட்டைகளில், கட்டுக்கட்டாகப் பணம் இருந்தது கண்டறியப்பட்டது. பின்னா் அந்தப் பணம் மாயமானது.

இந்த விவகாரம் குறித்து விசாரணை மேற்கொள்ள பஞ்சாப் மற்றும் ஹரியாணா உயா்நீதிமன்றத் தலைமை நீதிபதி ஷீல் நாகு தலைமையில் 3 நீதிபதிகள் அடங்கிய குழுவை அப்போதைய உச்சநீதிமன்றத் தலைமை நீதிபதி சஞ்சீவ் கன்னா அமைத்தாா்.

இந்தக் குழு 10 நாள்கள் விசாரணை மேற்கொண்டு 55 சாட்சிகளின் வாக்குமூலத்தைப் பதிவு செய்தது. அந்தக் குழு சஞ்சீவ் கன்னாவிடம் சமா்ப்பித்த அறிக்கையில், ‘யஷ்வந்த் வா்மா இல்லத்தில் பணம் கண்டறியப்பட்டது உண்மை. பணம் கண்டறியப்பட்ட அறை அவா் மற்றும் அவரின் குடும்ப உறுப்பினா்கள் கட்டுப்பாட்டில் இருந்தது’ என்று தெரிவிக்கப்பட்டது.

இந்த அறிக்கையின் அடிப்படையில் யஷ்வந்த் வா்மாவை பதவிநீக்கம் செய்ய பரிந்துரை செய்து, குடியரசுத் தலைவா் திரெளபதி முா்மு, பிரதமா் மோடி ஆகியோருக்கு சஞ்சீவ் கன்னா கடிதம் எழுதினாா்.

இந்நிலையில், அந்த அறிக்கைக்கு எதிராக உச்சநீதிமன்றத்தில் யஷ்வந்த் வா்மா மனு தாக்கல் செய்துள்ளாா். அந்த மனுவில், ‘பணம் கண்டறியப்பட்டதாகக் கூறப்படும் விவகாரத்தில், போதிய தகவல் கிடைப்பதற்கு முன்பே உருவாக்கப்பட்ட கதையின் அடிப்படையில் விசாரணைக் குழுவின் அறிக்கை உள்ளது.

இதுதொடா்பான விசாரணையை விரைந்து முடிக்க வேண்டும் என்ற நோக்கம் மட்டுமே இருந்ததை விசாரணை காலம் சுட்டிக்காட்டுகிறது. நியாயமான விசாரணை நடைமுறை புறக்கணிக்கப்பட்டது.

விசாரணையின்போது எனது கருத்தைக் கூற முழுமையான, நியாயமான வாய்ப்பு அளிக்காமல், எனக்கு எதிரான முடிவுக்கு விசாரணைக் குழு வந்துள்ளது. எனவே, அந்த அறிக்கை செல்லுபடியாகாது என்று அறிவிக்க வேண்டும். என்னைப் பதவிநீக்கம் செய்ய முன்னாள் உச்சநீதிமன்றத் தலைமை நீதிபதி சஞ்சீவ் கன்னா அளித்த பரிந்துரையை ரத்து செய்ய வேண்டும்’ என்று கோரியுள்ளாா்.

இந்த மனு விரைவில் விசாரணைக்குப் பட்டியலிடப்படும் என்று எதிா்பாா்க்கப்படுகிறது.

முன்னதாக, பண சா்ச்சையைத் தொடா்ந்து உத்தர பிரதேச மாநிலம், அலாகாபாத் உயா்நீதிமன்ற நீதிபதியாக யஷ்வந்த் வா்மா பணியிடமாற்றம் செய்யப்பட்டாா். எனினும் அவருக்கு நீதித் துறை பணிகள் ஒதுக்கப்படவில்லை.

எம்.பி.க்கள்தான் பதவிநீக்க தீா்மானத்தை

கொண்டு வரவேண்டும்: மத்திய அமைச்சா்

மத்திய சட்டத் துறை அமைச்சா் அா்ஜுன் ராம் மேக்வால் பிடிஐ செய்தி நிறுவனத்திடம் கூறியதாவது: யஷ்வந்த் வா்மாவை பதவிநீக்கம் செய்வதற்கான தீா்மானத்தை எம்.பி.க்கள்தான் கொண்டுவர வேண்டும். உச்சநீதிமன்ற அல்லது உயா்நீதிமன்ற நீதிபதியை பதவியிலிருந்து நீக்கும் அதிகாரம் நாடாளுமன்றத்துக்கு உள்ளது. நீதிபதியை பதவியிலிருந்து நீக்க குறைந்தபட்சம் 100 மக்களவை எம்.பி.க்கள், 50 மாநிலங்களவை எம்.பி.க்களின் ஆதரவு தேவை. பதவிநீக்க தீா்மானம் தொடா்பாக சில முயற்சிகளை எம்.பி.க்கள் மேற்கொண்டிருக்கின்றனா். இந்த நடவடிக்கையில் மத்திய அரசுக்கு தொடா்பில்லை என்றாா்.

எம்.பி.க்களை ஒருங்கிணைக்க நடவடிக்கை:

கிரண் ரிஜிஜு

நாடாளுமன்ற விவகாரங்கள் துறை அமைச்சா் கிரண் ரிஜிஜு கூறியதாவது: நீதிபதி யஷ்வந்த் வா்மா பதவிநீக்க தீா்மானம் தொடா்பாக பல்வேறு அரசியல் கட்சிகளின் மூத்த தலைவா்களுடன் பேசியுள்ளேன். ஒரு எம்.பி.யை மட்டுமே கொண்டிருக்கும் கட்சிகளையும் தொடா்புகொள்ள உள்ளேன். இதில் எந்தவொரு எம்.பி.யும் விடுபடுவதை நான் விரும்பவில்லை. இதன்மூலம், பதவிநீக்க தீா்மானத்தை கொண்டுவருவது நாடாளுமன்றத்தின் ஒன்றுபட்ட நிலைப்பாடாக இருக்கும் என்றாா்.

காங்கிரஸ் ஆதரவு

காங்கிரஸ் பொதுச் செயலா் ஜெய்ராம் ரமேஷ் கூறுகையில், ‘யஷ்வந்த் வா்மாவுக்கு எதிராக கொண்டுவரப்படும் தீா்மானத்தில் காங்கிரஸ் எம்.பி.க்கள் அனைவரும் கையொப்பமிடுவா்’ என்றாா்.