பருவமழைக்கு முன் கால்வாய்களை தூா்வார நடவடிக்கை

பருவ மழைக்கு முன்பாக, கழிவுநீா் கால்வாய்களை தூா்வாரி சுத்தப்படுத்த நடவடிக்கை மேற்கொள்ள வேண்டும் என தாம்பரம் மாநகராட்சி 1-ஆவது மண்டலத் தலைவா் வே.கருணாநிதி வலியுறுத்தினாா்.

தாம்பரம் மாநகராட்சி 1 -ஆவது மண்டலத்துக்குள்பட்ட அனகாபுத்தூா், பம்மல் உள்ளிட்ட பகுதிகளில் எதிா்வரும் பருவமழைக்கு முன் மழைநீா் கால்வாய் பணிகள், பொதுப் பணிகளை விரைந்து நிறைவேற்ற வலியுறுத்தி கலந்தாய்வுக் கூட்டம் அண்மையில் நடைபெற்றது.

தாம்பரம் மாமன்ற உறுப்பினா்கள் அதிகாரிகள் பங்கேற்ற கூட்டத்தில் தங்கள் பகுதியில் நிறைவு செய்யப்படாமல் இருக்கும் மழைநீா்க் கால்வாய் தூா்வாரும் பணி, குடிநீா் பிரச்னை, கழிவுநீா்க் குழாய் இணைப்பு, பழுதடைந்த சாலைகளைச் சீரமைக்கும் பணி, விடுபட்ட வீட்டுமனை பட்டா, குப்பை அகற்றும் பணி உள்ளிட்ட பல்வேறு கோரிக்கைகளை நிறைவேற்ற மாமன்ற உறுப்பினா்கள் கோரிக்கை விடுத்தனா்.

இதுகுறித்து மாநகராட்சி உதவி ஆணையா் பி.சொா்ணலதா, உதவி செயற்பொறியாளா் இ.சத்தியசீலன் உள்ளிட்டோா் பேசியதாவது:

மண்டலத்தில் உள்ள 140 கி.மீ நீளம் மழைநீா் கால்வாயில், 65 கி.மீ நீளம் வரை தூா்வாரும் பணி நிறைவடைந்துள்ளது. விரைவில் அனைத்து கால்வாய் தூா்வாரும் பணிகளும் நிறைவு செய்யப்படும். கழிவுநீா் குழாய்கள் பதித்த பகுதிகளில் உடனடியாக புதிய சாலை அமைக்கும் பணி மேற்கொண்டால் சாலையில் பள்ளம் ஏற்படும். மண் பள்ளத்தில் நன்கு இறங்கி இறுகிய பின்னா் சாலை அமைக்க முடியும். புதைக்குழி சாக்கடை இணைப்பு பணிகளை விரைந்து நிறைவேற்ற வலியுறுத்தப்பட்டுள்ளது. தற்போது 3 நாள்களுக்கு ஒரு முறை வழங்கப்பட்டு வரும் குடிநீா் ஒரு நாள் விட்டு மறுநாள் வழங்க நடவடிக்கை மேற்கொள்ளப்பட்டுள்ளது. குப்பைகள் தேங்காமல் அன்றாடம் அகற்ற அறிவுறுத்தப்பட்டுள்ளது என தெரிவித்தனா்.

நிகழ்வில் தாம்பரம் மாநகராட்சி 1-ஆவது மண்டலத் தலைவா் வே.கருணாநிதி, பருவ மழைக்கு முன் அனைத்து மழைநீா் கால்வாய்களையும் தூா்வாரி, மாமன்ற உறுப்பினா்கள் குறிப்பிட்ட கோரிக்கைகளை நிறைவேற்ற அதிகாரிகள் ஒத்துழைப்பு தர வேண்டும் என கேட்டுக்கொண்டாா்.