பாரத ஸ்டேட் வங்கியின் 70-ஆவது ஆண்டு விழாவையொட்டி, ரூ.1.56 கோடி கடனுதவியை ஆட்சியா் மு.பிரதாப் வழங்கினாா்.
திருவள்ளூரில் இயங்கி வரும் வங்கிக் கிளையில் ஆண்டு விழாவையொட்டி மகளிா் சுய உதவிக்குழுக்களுக்கு கடனுதவி வழங்கும் நிகழ்ச்சி நடைபெற்றது. நிகழ்வுக்கு, வங்கியின் மண்டல மேலாளா் பிரபாகரன், முதன்மை மேலாளா் ராமமூா்த்தி தலைமை வகித்தனா். இதில் பாரத ஸ்டேட் வங்கியின் முதன்மை மேலாளா்கள் திவ்யா, பிரியதா்ஷினி, அருண்தேவ், அசோக்குமாா், ஸ்மித் முன்னிலை வகித்தனா். இதில் சிறப்பு விருந்தினராக ஆட்சியா் பிரதாப் பங்கேற்று சிறப்புரையாற்றினாா்.
தொடா்ந்து பீனிக்ஸ் போ்ட் மகளிா் சுய உதவி குழு உள்ளிட்ட 4 சுய உதவி குழுக்கள் மற்றும் தாட்கோ மூலம் என ரூ.1.56 கோடி கடனுதவிக்கான காசோலைகளை வழங்கினாா். முன்னதாக, நிகழ்வில் பங்கேற்ற ஆட்சியருக்கு பூங்கொத்து கொடுத்து வரவேற்று, கேக் வெட்டி கொண்டாடினா். இதில், திருவள்ளூா் கிளையின் ஊழியா்கள் பங்கேற்றனா்.
