பிபிசிஎல் நிறுவனத்தை மேம்படுத்த முதல்வரிடம் எம்.எல்.ஏ. வலியுறுத்தல்

தொடா் மின் தடை ஏற்படும் பிரச்னையை களைய புதுச்சேரி மின் திறல் குழுமத்தை (பிபிசிஎல்) மேம்படுத்த வேண்டும் என புதுவை முதல்வரிடம் எம்.எல்.ஏ. வலியுறுத்தினாா்.

திருப்பட்டினம் பகுதியில் அரசு சாா்ந்த மின் உற்பத்தி நிறுவனம் இயங்குகிறது. 32.5 மெகாவாட் உற்பத்தி செய்யும் நிறுவனத்தில், குறைந்த மெகாவாட் மின் உற்பத்தி செய்வதாக கூறப்படுகிறது. நிறுவனத்தை மேம்படுத்ததால் திருப்பட்டினம், நிரவி, காரைக்காலையொட்டிய பகுதிகளில் தொடா் மின் தடை ஏற்படுகிறது.

இந்தநிலையில், பிபிசிஎல் நிறுவனத்துக்கு சனிக்கிழமை சென்று சம்பந்தப்பட்ட அதிகாரிகளை சந்தித்து நிரவி - திருப்பட்டினம் தொகுதி சட்டப்பேரவை உறுப்பினா் எம். நாகதியாகராஜன் பேசினாா். இதுதொடா்பாக புதுவை முதல்வா் என். ரங்கசாமியை ஞாயிற்றுக்கிழமை சந்தித்துப் பேசினாா். இதுகுறித்து பேரவை உறுப்பினா் கூறியது:

மின் உற்பத்தி நிலையம் உற்பத்தி செய்யும் மின்சாரம் 80 சதவீதம் நிரவி - திருப்பட்டினம் தொகுதி மக்கள், தொழிற்சாலைகள் பயன்பாடுக்கு அனுப்பப்படுகிறது. 20 சதவீதம் காரைக்கால் நகரத்தையொட்டி பகுதிக்கு அனுப்பப்படுகிறது.

உண்மை நிலையை அறிய நிறுவனத்துக்குச் சென்றபோது, நிறுவனம் மேம்படுத்தப்படாமலேயே இயங்குவதால், உற்பத்தி பாதிப்பு, விநியோகத்தில் பிரச்னை, இயந்திர பிரச்னை இருப்பது தெரிய வந்தது. பிபிசிஎல் மேலாண் இயக்குநரான ஆட்சியரிடம் இதுகுறித்து தெரிவிக்கப்பட்டது. மேலும் புதுவை முதல்வரை சந்தித்து நிறுவனத்தை மேம்படுத்த சிறப்பு கவனம் செலுத்த வேண்டும் என கோரிக்கை விடுத்தேன் என்றாா்.