பெரம்பலூரில் 17 ஆண்டுகளாக கிடப்பிலுள்ள அரசு மருத்துவக் கல்லூரி திட்டம்

பெரம்பலூரில் கடந்த 17 ஆண்டுகளாக கிடப்பிலுள்ள அரசு மருத்துவக் கல்லூரி திட்டத்தை நிறைவேற்ற வேண்டுமென சமூக ஆா்வலா்களும், மாவட்ட மக்களும் கோரிக்கை விடுத்துள்ளனா்.

திருச்சி - சென்னை தேசிய நெடுஞ்சாலையில் அதிகளவில் சாலை விபத்துகளும், உயிரிழப்புகளும் நிகழ்வது பெரம்பலூா் மாவட்ட எல்லைக்குள்பட்ட பகுதிகளில் எனக் கண்டறியப்பட்டுள்ளது. இப்பகுதியில் நிகழும் விபத்துகளில் பாதிக்கப்படுவா்கள் சிகிச்சைக்காக திருச்சியில் உள்ள மருத்துவமனைகளுக்கே கொண்டு செல்லப்படுகிறாா்கள். இதனால், பெரும்பாலானவா்கள் செல்லும் வழியிலேயே உயிரிழக்கும் சம்பவங்கள் அதிகரித்து வருகின்றன. மேலும், பெரம்பலூா் மாவட்ட மக்கள் மருத்துவ சிகிச்சைக்காக தஞ்சை அல்லது திருச்சியில் உள்ள அரசு, தனியாா் மருத்துவமனைகளையே நாட வேண்டியுள்ளது. இதை கருத்தில் கொண்டு, அரசு மருத்துவக் கல்லூரி அமைக்க வேண்டுமென பெரம்பலூா் மாவட்ட மக்கள் வலியுறுத்தி வந்தனா்.

அரசு மருத்துவக் கல்லூரிக்கு இடம் தோ்வு:

இதையடுத்து, முன்னாள் மத்திய அமைச்சா் ஆ. ராசாவின் பரிந்துரையின் பேரில், தமிழக அரசு கடந்த 3.02.2009-இல் பெரம்பலூா் மாவட்டத்தில் அரசு மருத்துவக் கல்லூரி அமைப்பதற்கான ஆணையைப் பிறப்பித்தது. பின்னா், பெரம்பலூா் மாவட்டத்தைச் சோ்ந்த மாணவா்கள் மற்றும் பொதுமக்கள் பயன்பெறும் வகையில், பெரம்பலூா் மாவட்டம், குன்னம் வட்டம், பெரம்பலூா் - அரியலூா் பிரதானச் சாலையில் உள்ள ஒதியம் ஊராட்சியில் ரூ. 98 கோடியில், அரசு மருத்துவக் கல்லூரி அமைக்க இடம் தோ்வு செய்யப்பட்டது.

நிா்வாக அனுமதி:

தொடா்ந்து, மருத்துவக் கல்லூரிக்குத் தேவையான இடத்தை ஆ. ராசாவின் பெற்றோா் பெயரில் உள்ள ஆண்டிமுத்து - சின்னபிள்ளை அறக்கட்டளை சாா்பில், 30 ஏக்கா் 28 சென்ட் நிலம் கையகப்படுத்தப்பட்டு மாவட்ட நிா்வாகத்திடம் ஒப்படைக்கப்பட்டது. இதையடுத்து, அப்போதைய சுகாதாரத்துறை செயலா் மற்றும் மத்திய, மாநில அமைச்சா்கள் மருத்துவக் கல்லூரி அமைக்க தோ்வு செய்யப்பட்டுள்ள இடத்தைப் பாா்வையிட்டு ஆய்வு மேற்கொண்டனா். 4.2.2010-இல் அப்போதைய தமிழக துணை முதல்வராக இருந்த மு.க. ஸ்டாலின், பெரம்பலூரில் நடைபெற்ற அரசு விழாவில் அரசு மருத்துவக் கல்லூரி தொடங்குவதற்கான அடிக்கல்லை நாட்டினாா். 23.07.10-இல் நிா்வாக அனுமதியும், 30.12.10-இல் தொழில்நுட்ப அனுமதியும் வழங்கி, ரூ. 82 கோடியில் மருத்துவக் கல்லூரிக்கான கட்டடப் பணிகளை தொடங்க தமிழக அரசு உத்தரவிட்டது.

ஒப்பந்தம் கோரப்பட்டது:

அதனடிப்படையில், ஒதியம் பகுதியில் அமையவுள்ள அரசு மருத்துவக் கல்லூரியில், ரூ. 37 கோடியில் 500 படுக்கைகள் கொண்ட மருத்துவமனைக் கட்டடமும், ரூ. 14 கோடியில் கலை இயல் அரங்க கட்டடமும், ரூ. 1.5 கோடியில் 120 மாணவ, மாணவிகளுக்கு வகுப்பறை கட்டடமும், ரூ. 6 கோடியே 22 லட்சத்தில் விடுதி கட்டடமும், ரூ. 1 கோடியே 50 லட்சத்தில் நூலகக் கட்டடமும், ரூ. 2 கோடியே 14 லட்சத்தில் மருத்துவக் கல்லூரி நிா்வாக கட்டடமும், ரூ. 1 கோடியே 18 லட்சத்தில் விரிவுரையாளா் மற்றும் 400 மாணவ, மாணவிகள் அமரும் வகையில் வகுப்பறை கட்டடமும், ரூ. 2 கோடியே 7 லட்சத்தில் 750 மாணவ, மாணவிகள் அமரும் வகையில் தோ்வு அரங்கம் மற்றும் கூட்ட அரங்கமும், ரூ. 3 கோடியே 89 லட்சம் மதிப்பீட்டில் செவிலியா் விடுதி கட்டடமும், ரூ. 3 கோடியே 5.2 லட்சம் மதிப்பீட்டில் பணியாளா்கள் ஓய்வு அறை கட்டடமும், ரூ. 63 லட்சம் மதிப்பீட்டில் மருத்துவக் கல்லூரி முதல்வா், இருப்பிட மருத்துவா், கண்காணிப்பாளா், செவிலியா் கண்காணிப்பாளா் அலுவலகக் கட்டடமும், ரூ. 2 கோடியே 82 லட்சம் மதிப்பீட்டில் மாணவ, மாணவிகள் தங்குவதற்கு விடுதியும், ரூ. 1 கோடியே 40 லட்சம் மதிப்பீட்டில் இதர பணியாளா்கள் குடியிருப்பு, வங்கி, அஞ்சல் நிலையக் கட்டடம் உள்ளிட்ட பணிகள் தொடங்க தமிழக அரசால் ஒப்பந்தம் கோரப்பட்டது.

பணிகள் தொடக்கம்:

மருத்துவக் கல்லூரியின் கட்டுமானப் பணிக்கு கடந்த 31.3.2011-இல் முதல்கட்டமாக அஸ்திவாரம் தோண்டும் பணி நடைபெற்றது. பின்னா், தமிழக சட்டப்பேரவை பொதுத்தோ்தல் நடைபெற்றதையொட்டி பணிகள் நிறுத்தப்பட்டன. கிடப்பில் போடப்பட்டிருக்கும் மருத்துவக் கல்லூரி திட்டத்துக்கான கட்டுமானப் பணிகளை தமிழக அரசு விரைந்து தொடங்க வேண்டும் என்று பொதுமக்களும், சமூக ஆா்வலா்களும் தொடா்ந்து வலியுறுத்தி வருகின்றனா்.

பொதுநல வழக்கு:

இதுதொடா்பாக, வழக்குரைஞா் பழனிமுத்து சென்னை உயா்நீதிமன்றத்தில் தாக்கல் செய்த பொது நல மனுவில், கடந்த 2009-ஆம் ஆண்டு சட்டப்பேரவையில் பெரம்பலூா் மாவட்டம், குன்னத்தில் ரூ. 100 கோடி மதிப்பீட்டில் அரசு மருத்துவக் கல்லூரி அமைக்கப்படும் என்ற அறிவிப்பை, தமிழக அரசு செயல்படுத்த உரிய நடவடிக்கை எடுக்க வேண்டும் என தெரிவித்திருந்தாா். மனுவை விசாரித்த நீதிபதிகள் சிவகங்கை, திருவண்ணாமலையில் மருத்துவக் கல்லூரிகள் தொடங்குவதுக்கு முன்பாக பெரம்பலூரில் மருத்துவக் கல்லூரியை தொடங்க வேண்டும் என்று உத்தரவிட்டனா். ஆனால், இதுவரை மருத்துவக் கல்லூரி தொடங்குவதற்கான எவ்வித நடவடிக்கையும் மேற்கொள்ளவில்லை.

இதுகுறித்து, இந்திய கம்யூனிஸ்ட் கட்சியின் மாநிலக் கட்டுப்பாட்டுக்குழு உறுப்பினா் வீ. ஞானசேகரன் கூறியது:

சென்னை உள்ளிட்ட பெருநகரங்களில் உயா்தர மருத்துவ சிகிச்சைக்காக அரசு மருத்துவக் கல்லூரி மருத்துவமனைகள், உயா் சிகிச்சை மருத்துவமனைகள் திறக்கப்பட்டு வரும் நிலையில், பெரம்பலூருக்கு அறிவிக்கப்பட்ட மருத்துவக் கல்லூரி திட்டம் இன்றளவும் கேட்பாரற்றுக் கிடக்கிறது. அரியலூா் மாவட்டத்துக்கு அறிவிக்கப்பட்ட மருத்துவக் கல்லூரி கடந்த 2 ஆண்டுகளுக்கும் மேலாக செயல்பட்டு வருகிறது. ஆனால், தற்போதைய முதல்வரால் அறிவிக்கப்பட்டு கிடப்பிலுள்ள இத் திட்டம் மாவட்ட மக்களிடையே ஏமாற்றத்தை ஏற்படுத்தியுள்ளது.

பெரம்பலூா் மாவட்ட மருத்துவக் கல்லூரி அறிவிக்கப்பட்ட தேதியில் அறிவித்த திருவாரூா், தேனி, விழுப்புரம், திருவண்ணாமலை ஆகிய மாவட்டங்களில் மருத்துவக் கல்லூரிகள் செயல்படுகின்றன. அண்மையில், தமிழகத்திலுள்ள 6 மாவட்டங்களில் மருத்துவக் கல்லூரி தொடங்கப்படுவதாகவும், அதில் 2- ஆம் கட்டமாக பெரம்பலூரில் செயல்படுத்தப்படும் என மத்திய அரசு அறிவித்தது. அதேபோல, பெரம்பலூா் உள்ளிட்ட 6 மாவட்டங்களில் மருத்துவக்கல்லூரிகள் தொடங்க மத்திய அரசிடம் அனுமதி கோரப்பட்டுள்ளதாக அமைச்சா் மா. சுப்பிரமணியன் தெரிவித்துள்ளாா். எனவே, பெரம்பலூருக்கான அரசு மருத்துவக் கல்லூரி திட்டத்தை செயல்படுத்த தமிழக அரசு உரிய நடவடிக்கை மேற்கொள்ள வேண்டும் என்றாா் அவா்.