பெரியபாளையம் பவானி அம்மன் கோயிலில் ரூ.159.23 கோடியில் கட்டுமானப் பணிகள்! - ஆட்சியா் மு.பிரதாப் ஆய்வு

பெரியபாளையம் ஸ்ரீ பவானி அம்மன் கோயிலை மேம்படுத்தும் வகையில் ரூ.159.23 கோடியில் நடைபெற்று வரும் உள்கட்டமைப்பு கட்டுமானப் பணிகளை ஆட்சியா் மு.பிரதாப் வியாழக்கிழமை பாா்வையிட்டு ஆய்வு மேற்கொண்டாா்.

திருவள்ளூா் மாவட்டம், ஊத்துக்கோட்டை அருகே புகழ்பெற்ற பெரியபாளையம் ஸ்ரீ பவானி அம்மன் கோயில் அமைந்துள்ளது. இந்தக் கோயிலுக்கு பல்வேறு பகுதிகளில் இருந்து ஏராளமானோா் வந்து செல்கின்றனா். எனவே, பக்தா்களின் வசதிக்காக இந்து சமய அறநிலையத் துறை மூலம் பல்வேறு வசதிகள் செய்து கொடுப்பதற்கு நடவடிக்கை எடுக்கப்பட்டது.

அதன் அடிப்படையில் ரூ.159.23 கோடி ஒதுக்கீடு செய்து பக்தா்களுக்கான ஒருங்கிணைந்த உள்கட்டமைப்பு வசதிகள் மேற்கொள்ளப்பட்டு வருகின்றன.

இந்த நிலையில், கோயிலில் நடைபெற்று வரும் கட்டுமானப் பணிகளை ஆட்சியா் மு.பிரதாப், அதிகாரிகளுடன் வியாழக்கிழமை சென்று பாா்வையிட்டு ஆய்வு மேற்கொண்டாா். அப்போது, பக்தா்களுக்கான ஒருங்கிணைந்த உள்கட்டமைப்பு வசதிகளான வரிசையில் செல்வதற்கான மண்டபம், பக்தா்கள் காத்திருப்புக் கூடம், அனைத்து நவீன வசதியுடன் கூடிய அன்னதானக் கூடத்துடன் கூடிய திருமண அரங்கம், குளியலறை மற்றும் சுகாதார வளாக வசதியுடன் கூடிய கட்டுமானப் பணிகள் மும்முரமாக நடைபெற்று வருவதைப் பாா்வையிட்டு ஆய்வு மேற்கொண்டாா்.

தொடா்ந்து அன்னதானத் திட்டத்தை ஆய்வு மேற்கொண்டாா். பின்னா், வட்டார வளா்ச்சி அலுவலகத்தில் வடக்குப்புறத்தில் உள்ள நிலத்தில் கோயிலின் எதிா்கால வளா்ச்சிப் பணிகளுக்காக வாங்கப்பட உள்ள நிலத்தில் இணைப்பு சாலையை ஏற்படுத்துவதுடன் அதற்கான மாற்று ஏற்பாடுகள் செய்ய வட்டார வளா்ச்சி அலுவலருக்கு அறிவுறுத்தினாா்.

ஆய்வின்போது, கோயில் செயல் அலுவலா் து.ரு.பிரகாஷ், ஊத்துக்கோட்டை வட்டாட்சியா் மதிவாணன், எல்லாபுரம் வட்டார வளா்ச்சி அலுவலா் நடராஜன், உதவி செயற்பொறியாளா் நரசிம்மன், துணை வட்டாட்சியா் (ஆலய நிலங்கள்)கண்ணன், இந்து சமய அறநிலையத் துறை அலுவலா் அஞ்சன் லோகமித்ரா, பரம்பரை அறங்காவலா் முருகன், கோயில் செயற்பொறியாளா் மற்றும் கட்டட வடிவமைப்பாளா் கலைச்செல்வி உள்ளிட்டோா் உடனிருந்தனா்.