அரசுப் பள்ளிகளில் மாணவா்கள் சோ்க்கையை அதிகரிக்க பெற்றோா்- பொதுமக்கள் சந்திப்பு இயக்கம் நடத்த தமிழ்நாடு ஆரம்பப் பள்ளி ஆசிரியா் கூட்டணி முடிவு செய்தது.
இந்த இயக்கத்தின் சிவகங்கை மாவட்டச் செயற்குழுக் கூட்டம் மாவட்டத் தலைவா் புரட்சித் தம்பி தலைமையில் புதன்கிழமை நடைபெற்றது. மாநில செயற்குழு உறுப்பினா் முத்துப்பாண்டியன் முன்னிலை வகித்தாா். மாவட்டச் செயலா் சகாயதைனேஸ் தீா்மானங்களை முன்மொழிந்து பேசினாா். மாநில துணைத் தலைவா் ஆரோக்கியராஜ் சிறப்பு அழைப்பாளராகப் பங்கேற்றாா். மாவட்டப் பொருளாளா் கலைச்செல்வி, மாநில பொதுக்குழு உறுப்பினா்கள் சிங்கராயா், குமரேசன், மாவட்டத் துணை நிா்வாகிகள் பஞ்சு ராஜ், முத்துக்குமாா், கஸ்தூரி, சேவியா் சத்தியநாதன், கல்வி மாவட்டச் செயலா் ஜெயக்குமாா் உள்ளிட்டோா் கலந்து கொண்டனா்.
கூட்டத்தில் நிறைவேற்றப்பட்ட தீா்மானங்கள்: சா்வதேச மகளிா் தினத்தையொட்டி மாநில அளவில் காஞ்சிபுரம் படப்பையில் மாா்ச் 15-இல் 5,000 ஆசிரியைகள் பங்கேற்கும் விழாவில் சிவகங்கை மாவட்டத்திலிருந்து 70
ஆசிரியைகள் உள்பட 100 போ் பங்கேற்க வேண்டும். தமிழக அரசு பழைய ஓய்வூதியத் திட்டம், இடைநிலை ஆசிரியா்களின் ஊதிய முரண்பாட்டை களைவது, அரசாணை எண் 243 -ஐ ரத்து செய்தல் உள்ளிட்ட 10 கோரிக்கைகளை நிறைவேற்ற வேண்டும்.
ஊக்க ஊதிய உயா்வு, ஆசிரியா் தகுதித் தோ்வு வழக்குகளை இழுத்தடிக்காமல் விரைந்து முடிக்க வேண்டும். வருகிற கல்வி ஆண்டில் அதிகளவில் மாணவா்களை சோ்க்கும் வகையில் பொதுமக்கள்- பெற்றோா்கள் சந்திப்பு இயக்கத்தை சங்க உறுப்பினா்கள் மேற்கொள்ள வேண்டும் என்பன உள்ளிட்ட தீா்மானங்கள் நிறைவேற்றப்பட்டன.
