போதைப் பொருட்கள் பயன்பாட்டில் தமிழகம் முதலிடத்தில் உள்ளது: எச். ராஜா

போதைப் பொருட்கள் பயன்பாட்டில் தமிழகம் முதலிடத்தில் உள்ளது என பாஜக தேசிய செயற்குழு உறுப்பினா் எச். ராஜா கூறினாா்.

மயிலாடுதுறை புதன்கிழமை நடைபெற்ற, காங்கிரஸ் அரசால் 1975-ஆம் ஆண்டு அறிவிக்கப்பட்ட நெருக்கடி நிலை அத்துமீறல், அரசியல் சட்டத்துக்கு எதிரான நிலையை விளக்கி, சிறை சென்ற போராளிகளுக்கு பாராட்டு மற்றும் விழிப்புணா்வுக் கூட்டத்தில் சிறப்பு அழைப்பாளராக பங்கேற்ற பின்னா் அவா் செய்தியாளா்களிடம் கூறியது:

இந்தியாவில் போதைப் பொருட்கள் அதிகம் உபயோகிக்கும் மாநிலமாக பஞ்சாப் இருந்தது மாறி தற்போது தமிழகம் முதலிடத்தில் உள்ளது. தமிழகத்தின் அடுத்த தலைமுறை காப்பாற்றப்பட வேண்டுமென்றால் இந்த அரசு தூக்கி எறியப்பட வேண்டும்.

கோயில் பணத்தில் நடத்திய முருகன் மாநாட்டில் பேசிய துணை முதல்வா் உதயநிதி இது ஆன்மிக மாநாடு அல்ல என்கிறாா். அப்படியெனில் எதற்கு கோயில் பணத்தை எடுத்தனா்? இதுதொடா்பாக அறநிலையத்துறை அமைச்சா் சேகா்பாபு, உதயநிதி மீது வழக்கு பதிவு செய்ய வேண்டும்.

தமிழகம் முழுவதும் கடந்த 4 ஆண்டுகளில் 6,700 கொலைகள் நடந்துள்ளன. மனிதாபிமான உணா்வு உள்ள பொதுமக்கள் இந்த அரசை ஆதரிக்க மாட்டாா்கள். தேசிய ஜனநாயக கூட்டணி மட்டுமே தமிழக மக்களை காப்பாற்றும் என்றாா்.

பாஜக மாவட்ட தலைவா் நாஞ்சில் ஆா். பாலு, மத்திய அரசு வழக்குரைஞா் கே. ராஜேந்திரன், மாவட்ட முன்னாள் தலைவா் க. அகோரம், மாநில செயற்குழு உறுப்பினா் கோவி. சேதுராமன் உள்ளிட்டோா் உடனிருந்தனா்.