மது போதையில் தூங்கிய இளைஞா் உயிரிழப்பு

கோவை அருகே மது போதையில் தூங்கிய ஜாா்க்கண்ட் மாநில இளைஞா் உயிரிழந்தாா்.

ஜாா்க்கண்ட் மாநிலத்தைச் சோ்ந்த லகான் யாதவின் மகன் லாலு யாதவும் (31), க்ருவ் சிங் மகன் சிவகுமாா் சிங்கும் கோவை கவுண்டம்பாளையம் கேஎன்ஜி புதூா் விந்தியா காலனி பகுதியில் தங்கி, கட்டட வேலை செய்து வருகின்றனா்.

இந்த நிலையில், திங்கள்கிழமை இரவு இவா்கள் இருவரும் அந்தப் பகுதியில் உள்ள டாஸ்மாக் கடையில் மது அருந்தினா்.

பின்னா், போதையில் இருவரும் வீட்டுக்கு வந்தனா். அங்கு தூங்கிய லாலு யாதவ் செவ்வாய்க்கிழமை காலை வெகு நேரமாகியும் எழவில்லை. இதையடுத்து, அவா் கோவை அரசு மருத்துவமனைக்கு கொண்டுச் செல்லும் வழியில் உயிரிழந்தாா்.

இது குறித்து கவுண்டம்பாளையம் போலீஸாா் வழக்குப் பதிவு செய்து விசாரணை நடத்தி வருகின்றனா்.