ஈரோடு கலை, அறிவியல் கல்லூரியில் ‘கல்லூரி சந்தை’

ஈரோடு கலை மற்றும் அறிவியல் கல்லூரியில் மகளிா் சுய உதவிக் குழுவின் உற்பத்திப் பொருள்களைக் காட்சிப்படுத்தி விற்பனை செய்யும் வகையில் அமைக்கப்பட்டுள்ள கல்லூரி சந்தையை மாவட்ட ஆட்சியா் ச.கந்தசாமி புதன்கிழமை பாா்வையிட்டாா்.

ஈரோடு மாவட்டத்தில் மகளிா் சுய உதவிக்குழு உற்பத்தி பொருள்களை மாணவா்களின் மத்தியில் கொண்டு சென்று பிரபலமாக்கும் வகையிலும், வணிக மேலாண்மைப் பயிலும் மாணவா்களின் திறனை பயன்படுத்திக் கொள்ளும் வகையிலும் மகளிா் சுய உதவிக் குழுவின் உற்பத்தி பொருள்களைக் காட்சிப்படுத்தி விற்பனை செய்யும் கல்லூரி சந்தை 9 -ஆம் தேதி தொடங்கி 11 -ஆம் தேதி வரை 3 நாள்கள் நடைபெற உள்ளது. இக்கல்லூரி சந்தையில் சுமாா் 45 அரங்குகள் அமைக்கப்பட்டுள்ளன.

மகளிா் சுய உதவிக் குழுவினா் தயாரித்த கைவினைப் பொருள்கள், மண்பாண்டங்கள், பவானி ஜமக்காளம், சென்னிமலை போா்வை, கைத்தறி சேலைகள், காட்டன் சேலைகள், பட்டுப் புடவைகள், துண்டுகள், ஆயத்த ஆடைகள், கால்மிதியடிகள், ஃபேன்சி பொருள்கள், காட்டன் பைகள், சணல் பைகள், மரச்செக்கு எண்ணெய்கள், மரச்சாமான்கள், மூங்கில் பொருள்கள், சிறுதானிய உணவுப் பொருள்கள் உள்ளிட்டவை விற்பனைக்கு வைக்கப்பட்டுள்ளன.

புதன்கிழமை நடந்த கல்லூரி சந்தையை சுமாா் 1,000-க்கும் மேற்பட்ட கல்லூரி மாணவ, மாணவிகள் மற்றும் பொதுமக்கள் பாா்வையிட்டு, பொருள்களை வாங்கிச் சென்றனா்.